jalwa-ba-jalwa samne aata hai koi aur

jalva-ba-jalva sāmne aatā hai koī aur

lahza-ba-lahza mujh ko lubhātā hai koī aur

parde meñ phuul jalva dikhātā hai koī aur

rang apnā rang-o-bū meñ jamātā hai koī aur

kaisā ġhurūr-e-husn kahāñ kā niyāz-e-ishq

duniyā ko un ke khel dikhātā hai koī aur

maiñ jāntā huuñ shaiḳh-o-barahman kī dauḌ-dhūp

rasta batā ke un ko phirātā hai koī aur

be-ḳhud hai dil ḳhayāl meñ ek mast-e-nāz ke

piitā hai koī aur pilātā hai koī aur

tuutī kī tarah ā.ina-e-kā.enāt meñ

kahtā huuñ vo jo pīchhe sikhātā hai koī aur

'zā.iq' sitam-zarīfī-e-daur-e-zamāñ ko dekh

daulat kisī kī aish uḌātā hai koī aur

jalwa-ba-jalwa samne aata hai koi aur

lahza-ba-lahza mujh ko lubhata hai koi aur

parde mein phul jalwa dikhata hai koi aur

rang apna rang-o-bu mein jamata hai koi aur

kaisa ghurur-e-husn kahan ka niyaz-e-ishq

duniya ko un ke khel dikhata hai koi aur

main jaanta hun shaiKH-o-barahman ki dauD-dhup

rasta bata ke un ko phiraata hai koi aur

be-KHud hai dil KHayal mein ek mast-e-naz ke

pita hai koi aur pilata hai koi aur

tuti ki tarah aaina-e-kaenat mein

kahta hun wo jo pichhe sikhata hai koi aur

'zaiq' sitam-zarifi-e-daur-e-zaman ko dekh

daulat kisi ki aish uData hai koi aur