jalwa-farma der tak dil-bar raha

jalva-farmā der tak dil-bar rahā

apnī kah lī sab ne maiñ shashdar rahā

jism be-his be-shikan bistar rahā

maiñ na.e andāz se muztar rahā

maiñ ḳharāb-e-bād-o-sāġhar rahā

dil fidā-e-sāqi-e-kausar rahā

maiñ rahā to bāġh-e-hastī meñ magar

be-navā be-āshiyāñ be-par rahā

sab chaman vāloñ ne to luuTī bahār

aur mujhe sayyād hī kā Dar rahā

koī samjhā rind koī muttaqī

lab pe tauba haath meñ sāġhar rahā

tham rahe aañsū rahī dil meñ jalan

nam rahīñ āñkheñ kaleja tar rahā

umr bhar phirtā rahā maiñ dar-ba-dar

mar ke bhī charchā mirā ghar ghar rahā

saikaḌoñ fikreñ haiñ tum ko āqilo

tum se to 'majzūb' hī behtar rahā

jalwa-farma der tak dil-bar raha

apni kah li sab ne main shashdar raha

jism be-his be-shikan bistar raha

main nae andaz se muztar raha

main KHarab-e-baad-o-saghar raha

dil fida-e-saqi-e-kausar raha

main raha to bagh-e-hasti mein magar

be-nawa be-ashiyan be-par raha

sab chaman walon ne to luTi bahaar

aur mujhe sayyaad hi ka Dar raha

koi samjha rind koi muttaqi

lab pe tauba hath mein saghar raha

tham rahe aansu rahi dil mein jalan

nam rahin aankhen kaleja tar raha

umr bhar phirta raha main dar-ba-dar

mar ke bhi charcha mera ghar ghar raha

saikaDon fikren hain tum ko aaqilo

tum se to 'majzub' hi behtar raha