jalwa jo tere ruKH ka ehsas mein Dhal jae

jalva jo tire ruḳh kā ehsās meñ Dhal jaa.e

is ālam-e-hastī kā aalam hī badal jaa.e

un mast nigāhoñ kā ik daur jo chal jaa.e

ham dard ke māroñ kī taqdīr badal jaa.e

masrūf-e-ibādat kā yuuñ ḳhatm ho afsāna

sar ho tirī chaukhaT pe dam merā nikal jaa.e

tū laakh bachā dāman dar se na uThūñgā maiñ

un meñ se nahīñ huuñ maiñ Taale se jo Tal jaa.e

ai jān-e-karam mujh par ek chashm-e-karam kar de

aisā na ho dīvāna qadmoñ pe machal jaa.e

hasrat bharī āñkhoñ meñ ik pal ke liye aa jā

dekhe jo terī sūrat dīvāna bahal jaa.e

tū aag mohabbat kī bhar de mirī nas nas meñ

har zarra mire dil kā is aag meñ jal jaa.e

bijlī tire jalvoñ kī gir jaa.e kabhī mujh par

ai jaan mirī hastī is aag meñ jal jaa.e

ai chāragaro dekho bīmār-e-mohabbat huuñ

tadbīr karo aisī dil jis se bahal jaa.e

tū jazb-e-mohabbat meñ kar le vo asar paidā

jis samt nazar uTThe ik tiir sā chal jaa.e

pāmāl-e-rah-e-ulfat ho jā.ūñ mohabbat meñ

vo shoḳh agar mujh ko qadmoñ se masal jaa.e

taqdīr kare ehsāñ yuuñ ba.ad-e-'fanā' mujh par

ḳhāk-e-dar-e-jānāna muñh par mire mal jaa.e

jalwa jo tere ruKH ka ehsas mein Dhal jae

is aalam-e-hasti ka aalam hi badal jae

un mast nigahon ka ek daur jo chal jae

hum dard ke maron ki taqdir badal jae

masruf-e-ibaadat ka yun KHatm ho afsana

sar ho teri chaukhaT pe dam mera nikal jae

tu lakh bacha daman dar se na uThunga main

un mein se nahin hun main Tale se jo Tal jae

ai jaan-e-karam mujh par ek chashm-e-karam kar de

aisa na ho diwana qadmon pe machal jae

hasrat bhari aankhon mein ek pal ke liye aa ja

dekhe jo teri surat diwana bahal jae

tu aag mohabbat ki bhar de meri nas nas mein

har zarra mere dil ka is aag mein jal jae

bijli tere jalwon ki gir jae kabhi mujh par

ai jaan meri hasti is aag mein jal jae

ai chaaragaro dekho bimar-e-mohabbat hun

tadbir karo aisi dil jis se bahal jae

tu jazb-e-mohabbat mein kar le wo asar paida

jis samt nazar uTThe ek tir sa chal jae

pamal-e-rah-e-ulfat ho jaun mohabbat mein

wo shoKH agar mujh ko qadmon se masal jae

taqdir kare ehsan yun baad-e-'fana' mujh par

KHak-e-dar-e-jaanana munh par mere mal jae