jami hun barf ki surat pighalna chahti hun main

jamī huuñ barf kī sūrat pighalnā chāhtī huuñ maiñ

hisār-e-zāt se bāhar nikalnā chāhtī huuñ maiñ

diyā ban kar nihāñ-ḳhānoñ meñ jalnā chāhtī huuñ maiñ

kisī kī ruuh ke sāñche meñ Dhalnā chāhtī huuñ maiñ

judā hotī hī aa.ī hai hamesha 'hīr' rāñjhe se

ab is rasm-e-mohabbat ko badalnā chāhtī huuñ maiñ

maiñ jis miTTī se aa.ī huuñ usī miTTī meñ milne tak

hazāroñ baar gir kar bhī sambhalnā chāhtī huuñ maiñ

ḳhizāñ ke Dar se ghabrā kar palaTnā chāhtā hai vo

har ik mausam meñ jis ke saath chalnā chāhtī huuñ maiñ

miTā Daalā hai yak-jehtī ko is firqa-parastī ne

kisī sūrat bhī ye sūrat badalnā chāhtī huuñ maiñ

maiñ chāhtī huuñ ki ban jā.ūñ kisī kī aarzū 'mīnā'

kisī kā ḳhvāb ban kar dil meñ palnā chāhtī huuñ maiñ

jami hun barf ki surat pighalna chahti hun main

hisar-e-zat se bahar nikalna chahti hun main

diya ban kar nihan-KHanon mein jalna chahti hun main

kisi ki ruh ke sanche mein Dhalna chahti hun main

juda hoti hi aai hai hamesha 'hir' ranjhe se

ab is rasm-e-mohabbat ko badalna chahti hun main

main jis miTTi se aai hun usi miTTi mein milne tak

hazaron bar gir kar bhi sambhalna chahti hun main

KHizan ke Dar se ghabra kar palaTna chahta hai wo

har ek mausam mein jis ke sath chalna chahti hun main

miTa Dala hai yak-jehti ko is firqa-parasti ne

kisi surat bhi ye surat badalna chahti hun main

main chahti hun ki ban jaun kisi ki aarzu 'mina'

kisi ka KHwab ban kar dil mein palna chahti hun main