jamuna mein kal naha kar jab usne baal bandhe

jamunā meñ kal nahā kar jab us ne baal bāñdhe

ham ne bhī apne dil meñ kyā kyā ḳhayāl bāñdhe

aisā shikoh us kī sūrat meñ hai ki nāgah

aave jo sāmne se dast-e-majāl bāñdhe

āñkhoñ se gar kare vo zulfoñ ko Tuk ishāra

aaveñ chale hazāroñ vahshī ġhazāl bāñdhe

iisā o ḳhizr tak bhī pahuñche ajal kā muzhda

tū teġh agar kamar par bahr-e-qitāl bāñdhe

laale kī shāḳh hargiz lahke na phir chaman meñ

gar sar pe surḳh chīrā vo naunihāl bāñdhe

lat āshiqī kī koī jaa.e hai āshiqoñ se

go bādshāh DāñDe go kotvāl bāñdhe

ham kis tarah se dekheñ jab de de pech laḌ ke

chīre ke pechoñ meñ to zulfoñ ke baal bāñdhe

banda huuñ maiñ to us kī āñkhoñ kī sāhirī kā

tār-e-nazar se jis ne sāhab-kamāl bāñdhe

ham ek bose ke bhī mamnūñ nahīñ kisī ke

chāhe so koī tohmat roz-e-visāl bāñdhe

soz-e-dil apnā us ko kyā 'mus.hafī' sunāveñ

aago hī vo phire hai kānoñ se shaal bāñdhe

jamuna mein kal naha kar jab us ne baal bandhe

hum ne bhi apne dil mein kya kya KHayal bandhe

aisa shikoh us ki surat mein hai ki nagah

aawe jo samne se dast-e-majal bandhe

aankhon se gar kare wo zulfon ko Tuk ishaara

aawen chale hazaron wahshi ghazal bandhe

isa o KHizr tak bhi pahunche ajal ka muzhda

tu tegh agar kamar par bahr-e-qital bandhe

lale ki shaKH hargiz lahke na phir chaman mein

gar sar pe surKH chira wo naunihaal bandhe

lat aashiqi ki koi jae hai aashiqon se

go baadshah DanDe go kotwal bandhe

hum kis tarah se dekhen jab de de pech laD ke

chire ke pechon mein to zulfon ke baal bandhe

banda hun main to us ki aankhon ki sahiri ka

tar-e-nazar se jis ne sahab-kamal bandhe

hum ek bose ke bhi mamnun nahin kisi ke

chahe so koi tohmat roz-e-visal bandhe

soz-e-dil apna us ko kya 'mushafi' sunawen

aago hi wo phire hai kanon se shaal bandhe