jasad ne jaan se puchha ki qalb-e-be-riya kya hai

jasad ne jaan se pūchhā ki qalb-e-be-riyā kyā hai

ḳhitāb aayā ki ā.īne meñ jauhar ke sivā kyā hai

ayaañ ā.īne meñ hai sūrat-e-ma.anī-safā kyā hai

nihāñ taskīn meñ hai iztirāb-e-dil riyā kyā hai

miTānā aap ko nābūd ho jaanā fanā kyā hai

samānā aap meñ aur ḳhud ba-ḳhud honā baqā kyā hai

do-ālam jalva-gāh-e-husn meñ ain-e-basīrat meñ

ye aks-e-shaḳhs hai ā.īne meñ sūrat-numā kyā hai

vo yaktā zaat hai ain-e-surūr-e-ilm-o-haq ai dil

nihāñ kasrat meñ vahdat ho ga.ī hai mā-sivā kyā hai

qidam hai zāt-e-vāhid haal hai mazī-o-mustaqbil

azal se tā abad kī ibtidā kyā intihā kyā hai

miTā kar dil se pindār-e-ḳhudī insāf se dekho

ki be-zauq-e-tamannā hastī-e-bīm-o-rajā kyā hai

na the aape meñ muusī varna un kā hausla kyā thā

jo bol uThte ki aa parda se bāhar dekhtā kyā hai

tajallī ban ga.ī 'sāhir' naqāb-e-rū-e-jān-e-jāñ

ki dīdan hukm-e-nā-dīdan hai yārab mājrā kyā hai

jasad ne jaan se puchha ki qalb-e-be-riya kya hai

KHitab aaya ki aaine mein jauhar ke siwa kya hai

ayan aaine mein hai surat-e-mani-safa kya hai

nihan taskin mein hai iztirab-e-dil riya kya hai

miTana aap ko nabud ho jaana fana kya hai

samana aap mein aur KHud ba-KHud hona baqa kya hai

do-alam jalwa-gah-e-husn mein ain-e-basirat mein

ye aks-e-shaKHs hai aaine mein surat-numa kya hai

wo yakta zat hai ain-e-surur-e-ilm-o-haq ai dil

nihan kasrat mein wahdat ho gai hai ma-siwa kya hai

qidam hai zat-e-wahid haal hai mazi-o-mustaqbil

azal se ta abad ki ibtida kya intiha kya hai

miTa kar dil se pindar-e-KHudi insaf se dekho

ki be-zauq-e-tamanna hasti-e-bim-o-raja kya hai

na the aape mein musi warna un ka hausla kya tha

jo bol uThte ki aa parda se bahar dekhta kya hai

tajalli ban gai 'sahir' naqab-e-ru-e-jaan-e-jaan

ki didan hukm-e-na-didan hai yarab majra kya hai