jashn-e-awargi-o-ranj-e-masafat ka sharik

jashn-e-āvārgī-o-ranj-e-masāfat kā sharīk

dasht kā dasht huā hai mirī vahshat kā sharīk

ab palaTne kā safar hai to nazar aatā nahīñ

vo jo rahtā thā hamesha mirī ujlat kā sharīk

ham ki har qarn meñ mil mil ke bichhaḌne vaale

aa ḳhudā ko bhī kareñ apnī rivāyat kā sharīk

sirf āñkhoñ ke namak ne nahīñ sīñchī hai ġhazal

dāna-e-dil bhī hai chakkī kī mashaqqat kā sharīk

chhoḌ jaatā hai kisī vaqt to dil bhī tanhā

kaun hotā hai mirī jaañ shab-e-vahshat kā sharīk

rang se rang milā aur huā ham-āmez

yuuñ banā vasl tire hijr kī rāhat kā sharīk

tū batā zard zamānoñ meñ bhaTakte hue chāñd

kaun rahtā hai is ā.īne kī hairat kā sharīk

munjamid vaqt ke TukḌoñ meñ pighaltī huī maiñ

aur ik lams mire lams kī hiddat kā sharīk

jashn-e-awargi-o-ranj-e-masafat ka sharik

dasht ka dasht hua hai meri wahshat ka sharik

ab palaTne ka safar hai to nazar aata nahin

wo jo rahta tha hamesha meri ujlat ka sharik

hum ki har qarn mein mil mil ke bichhaDne wale

aa KHuda ko bhi karen apni riwayat ka sharik

sirf aankhon ke namak ne nahin sinchi hai ghazal

dana-e-dil bhi hai chakki ki mashaqqat ka sharik

chhoD jata hai kisi waqt to dil bhi tanha

kaun hota hai meri jaan shab-e-wahshat ka sharik

rang se rang mila aur hua ham-amez

yun bana wasl tere hijr ki rahat ka sharik

tu bata zard zamanon mein bhaTakte hue chand

kaun rahta hai is aaine ki hairat ka sharik

munjamid waqt ke TukDon mein pighalti hui main

aur ek lams mere lams ki hiddat ka sharik