jashn manao rone wale girya bhul ke mast rahen

jashn manāo rone vaale girya bhuul ke mast raheñ

sārañgī ke tiir samā.at meñ imshab paivast raheñ

īrānī ġhālīche ke chau-gard nashisteñ qaa.em hoñ

kafūrī sham.oñ se raushan paiham ahl-e-hast raheñ

kasavāyā jaa.e ghoḌoñ se lakḌī ke pahiyoñ kā rath

tabl alam asvār payāde saare bandobast raheñ

rañg-e-saped-o-siyāh sunahrī sab shakloñ meñ zāhir hoñ

aag se apnī raakh uThā kar sonā chāñdī jast raheñ

naqqāre par choT marātib kā elaan sunātī hai

phuus kī kuTiyā.eñ marmar kī dīvāroñ se past raheñ

ek taraf kuchh hoñT mohabbat kī raushan āyāt paḌheñ

ik saf meñ hathiyār sajā.e saare jañg-parast raheñ

jashn manao rone wale girya bhul ke mast rahen

sarangi ke tir samaat mein imshab paiwast rahen

irani ghaaliche ke chau-gard nashisten qaem hon

kafuri shamon se raushan paiham ahl-e-hast rahen

kasawaya jae ghoDon se lakDi ke pahiyon ka rath

tabl alam aswar payaade sare bandobast rahen

rang-e-saped-o-siyah sunahri sab shaklon mein zahir hon

aag se apni rakh uTha kar sona chandi jast rahen

naqqare par choT maraatib ka elan sunati hai

phus ki kuTiyaen marmar ki diwaron se past rahen

ek taraf kuchh honT mohabbat ki raushan aayat paDhen

ek saf mein hathiyar sajae sare jang-parast rahen