jazba-e-shauq ka izhaar karun ya na karun

jazba-e-shauq kā iz.hār karūñ yā na karūñ

dil ko rusvā sar-e-bāzār karūñ yā na karūñ

dard ḳhud baḌh ke huā jaatā hai darmāñ dil kā

ab ilāj-e-dil-e-bīmār karūñ yā na karūñ

qais-o-mansūr kī taqlīd se dam ghuTtā hai

ehtimām-e-rasan-o-dār karūñ yā na karūñ

jis ko ḳhuddārī-e-jazbāt kā ehsās na ho

nazr us ko dil-e-ḳhuddār karūñ yā na karūñ

us kī rusvā.ī kā baa.is na hoñ merī ġhazleñ

nazr-e-ahbāb ye shahkār karūñ yā na karūñ

le na añgḌā.ī kahīñ gardish-e-ayyām 'umar'

husn-e-ḳhvābīda ko bedār karūñ yā na karūñ

jazba-e-shauq ka izhaar karun ya na karun

dil ko ruswa sar-e-bazar karun ya na karun

dard KHud baDh ke hua jata hai darman dil ka

ab ilaj-e-dil-e-bimar karun ya na karun

qais-o-mansur ki taqlid se dam ghuTta hai

ehtimam-e-rasan-o-dar karun ya na karun

jis ko KHuddari-e-jazbaat ka ehsas na ho

nazr us ko dil-e-KHuddar karun ya na karun

us ki ruswai ka bais na hon meri ghazlen

nazr-e-ahbab ye shahkar karun ya na karun

le na angDai kahin gardish-e-ayyam 'umar'

husn-e-KHwabida ko bedar karun ya na karun