jazba ghairat ka KHamida nahin hone deta

jazba ġhairat kā ḳhamīda nahīñ hone detā

bojh itnā hai ki sīdhā nahīñ hone detā

shart itnī hai gunahgār pashemāñ ho jaa.e

vo ḳhatā-posh hai rusvā nahīñ hone detā

khol detā hai phir ummīd kī khiḌkī koī

mujh ko mahrūm-e-tamannā nahīñ hone detā

buzdilī kuchh bhī anokhā nahīñ karne detī

ḳhauf-e-nākāmī karishma nahīñ hone detā

saañp ne aisā jamāyā hai shajar par qabza

panchhiyoñ kā bhī baserā nahīñ hone detā

zehn-o-dil donoñ meñ rakhtā huuñ banā kar 'vāsiq'

ghar ke andar koī jhagḌā nahīñ hone detā

jazba ghairat ka KHamida nahin hone deta

bojh itna hai ki sidha nahin hone deta

shart itni hai gunahgar pasheman ho jae

wo KHata-posh hai ruswa nahin hone deta

khol deta hai phir ummid ki khiDki koi

mujh ko mahrum-e-tamanna nahin hone deta

buzdili kuchh bhi anokha nahin karne deti

KHauf-e-nakaami karishma nahin hone deta

sanp ne aisa jamaya hai shajar par qabza

panchhiyon ka bhi basera nahin hone deta

zehn-o-dil donon mein rakhta hun bana kar 'wasiq'

ghar ke andar koi jhagDa nahin hone deta