jehl-e-KHirad ne din ye dikhae

jehl-e-ḳhirad ne din ye dikhā.e

ghaT ga.e insāñ baḌh ga.e saa.e

haa.e vo kyūñkar dil bahlā.e

ġham bhī jis ko raas na aa.e

zid par ishq agar aa jaa.e

paanī chhiḌke aag lagā.e

dil pe kuchh aisā vaqt paḌā hai

bhāge lekin raah na paa.e

kaisā majāz aur kaisī haqīqat

apne hī jalve apne hī saa.e

jhūTī hai har ek masarrat

ruuh agar taskīn na paa.e

kār-e-zamāna jitnā jitnā

bantā jaa.e bigaḌtā jaa.e

zabt-e-mohabbat shart-e-mohabbat

jī hai ki zālim umDā aa.e

husn vahī hai husn jo zālim

haath lagā.e haath na aa.e

naġhma vahī hai naġhma ki jis ko

ruuh sune aur ruuh sunā.e

rāh-e-junūñ āsān huī hai

zulf o mizha ke saa.e saa.e

jehl-e-KHirad ne din ye dikhae

ghaT gae insan baDh gae sae

hae wo kyunkar dil bahlae

gham bhi jis ko ras na aae

zid par ishq agar aa jae

pani chhiDke aag lagae

dil pe kuchh aisa waqt paDa hai

bhage lekin rah na pae

kaisa majaz aur kaisi haqiqat

apne hi jalwe apne hi sae

jhuTi hai har ek masarrat

ruh agar taskin na pae

kar-e-zamana jitna jitna

banta jae bigaDta jae

zabt-e-mohabbat shart-e-mohabbat

ji hai ki zalim umDa aae

husn wahi hai husn jo zalim

hath lagae hath na aae

naghma wahi hai naghma ki jis ko

ruh sune aur ruh sunae

rah-e-junun aasan hui hai

zulf o mizha ke sae sae