jhank kar zat ke andar ye tamasha dekho

jhāñk kar zaat ke andar ye tamāshā dekho

shahr sahrā meñ kabhī shahr meñ sahrā dekho

bahte dariyā meñ nazar aa.e har ik buuñd alag

ye nahīñ mo.ajiza gar buuñd meñ dariyā dekho

sūfiyo ma.arifat-e-ahal-e-safā to ye hai

kabhī insān meñ insāñ kā sarāpā dekho

qurmuzī rang lahū se hai pasīna merā

aur arbāb-e-havas rang-e-tamannā dekho

umr bhar tum pe rahe ahl-e-tamāshā kā hujūm

umr bhar tum ye tamāshā khaḌe tanhā dekho

ḳhvāb-sāzoñ kī hai ījād-e-hasīñ ye ummīd

sadā is aa.ine meñ tum ruḳh-e-zebā dekho

gar vo nā-bīnā ho kuchh harj nahīñ hai 'shaukat'

rahnumā ho na magar aql kā andhā dekho

jhank kar zat ke andar ye tamasha dekho

shahr sahra mein kabhi shahr mein sahra dekho

bahte dariya mein nazar aae har ek bund alag

ye nahin moajiza gar bund mein dariya dekho

sufiyo marifat-e-ahal-e-safa to ye hai

kabhi insan mein insan ka sarapa dekho

qurmuzi rang lahu se hai pasina mera

aur arbab-e-hawas rang-e-tamanna dekho

umr bhar tum pe rahe ahl-e-tamasha ka hujum

umr bhar tum ye tamasha khaDe tanha dekho

KHwab-sazon ki hai ijad-e-hasin ye ummid

sada is aaine mein tum ruKH-e-zeba dekho

gar wo na-bina ho kuchh harj nahin hai 'shaukat'

rahnuma ho na magar aql ka andha dekho