jhuT ki poshak par paiwand-kari kab talak

jhuuT kī poshāk par paivand-kārī kab talak

ham se āḳhir ye batāo hoshiyārī kab talak

sāhab-e-kashkol kuchh izzat kī rozī kar talāsh

yuuñ ikaTThā tū karegā rezgārī kab talak

raaz maiñ ne tum ko apnā de diyā kuchh soch kar

dekhnā hai rakh sakoge rāzdārī kab talak

ijz kī tākīd karte ho bahut taqrīr meñ

ye batāo zālimoñ se inkisārī kab talak

ja.al-sāzī kī kaTorī aur daane lobh ke

kah rahe haiñ kuchh parinde ai shikārī kab talak

ai havas ḳhoroñ mirī ma.asūm āñkhoñ ke liye

ḳhvāb lāoge sunahre baarī baarī kab talak

ab to vājib jaan le ta.alīm ko ai merī qaum

soch yuuñ bahkā.enge ja.alī pujārī kab talak

ham ko ye ġham hī na le Duube kahīñ ḳhallāq-e-ḳhalq

be-zamīroñ par rahegī tāj-dārī kab talak

vo bhī ik insān hai batlāo ai tāhir 'sa.ūd'

ḳhvāh-maḳhvāh suntā rahe āḳhir tumhārī kab talak

jhuT ki poshak par paiwand-kari kab talak

hum se aaKHir ye batao hoshiyari kab talak

sahab-e-kashkol kuchh izzat ki rozi kar talash

yun ikaTTha tu karega rezgari kab talak

raaz main ne tum ko apna de diya kuchh soch kar

dekhna hai rakh sakoge raazdari kab talak

ijz ki takid karte ho bahut taqrir mein

ye batao zalimon se inkisari kab talak

jal-sazi ki kaTori aur dane lobh ke

kah rahe hain kuchh parinde ai shikari kab talak

ai hawas KHoron meri masum aankhon ke liye

KHwab laoge sunahre bari bari kab talak

ab to wajib jaan le talim ko ai meri qaum

soch yun bahkaenge jali pujari kab talak

hum ko ye gham hi na le Dube kahin KHallaq-e-KHalq

be-zamiron par rahegi taj-dari kab talak

wo bhi ek insan hai batlao ai tahir 'saud'

KHwah-maKHwah sunta rahe aaKHir tumhaari kab talak