jhuT raushan hai ki sachchai nahin jaante hain

jhuuT raushan hai ki sachchā.ī nahīñ jānte haiñ

log ab vahm o gumāñ ko hī yaqīñ jānte haiñ

ye alag baat ki aatī nahīñ duniyā-dārī

ahl-e-duniyā ko magar gosha-nashīñ jānte haiñ

taaq o mehrāb kā ronā ho ki dīvār kā ġham

baam o dar par jo guzartī hai makīñ jānte haiñ

varaq-e-dil pe abhī naqsh hai shab-nāma-e-ġham

phir bhī har sub.h ko ham sub.h-e-hasīñ jānte haiñ

jhuk ke milte to haiñ vo ḳhāk-nashīnoñ se magar

āsmāñ vāloñ ko ham ahl-e-zamīñ jānte haiñ

sab ke hoñToñ pe munavvar haiñ hamāre qisse

aur ham apnī kahānī bhī nahīñ jānte haiñ

koī dar qābil-e-tāzīm nazar to aa.e

sar jhukānā hai kahāñ ahl-e-jabīñ jānte haiñ

jhuT raushan hai ki sachchai nahin jaante hain

log ab wahm o guman ko hi yaqin jaante hain

ye alag baat ki aati nahin duniya-dari

ahl-e-duniya ko magar gosha-nashin jaante hain

taq o mehrab ka rona ho ki diwar ka gham

baam o dar par jo guzarti hai makin jaante hain

waraq-e-dil pe abhi naqsh hai shab-nama-e-gham

phir bhi har subh ko hum subh-e-hasin jaante hain

jhuk ke milte to hain wo KHak-nashinon se magar

aasman walon ko hum ahl-e-zamin jaante hain

sab ke honTon pe munawwar hain hamare qisse

aur hum apni kahani bhi nahin jaante hain

koi dar qabil-e-tazim nazar to aae

sar jhukana hai kahan ahl-e-jabin jaante hain