ji bhara aata hai Khaali mai ka pyala de gaya

jī bharā aatā hai ḳhālī mai kā pyāla de gayā

dekhiyo kyā aaj ham ko shoḳh-bālā de gayā

us but-e-paimāñ-gusil ko jab ki maiñ laatā huuñ ghar

kuī nikoī de ke baalā mujh ko taalā de gayā

chāk-e-sīna ko jigar ko dāġh-e-dil ko dard-e-zaḳhm

tājir-e-ġham shahr-e-ulfat ke ye kaalā de gayā

kal ke din dikhlā ke apnā jalva-e-san.at-garī

yaad apnī shab ko vo bārī-ta.ālā de gayā

naam apnā japne ko har har tarah se har jagah

sub.ha to masjid meñ but-ḳhāne meñ maalā de gayā

ji bhara aata hai KHali mai ka pyala de gaya

dekhiyo kya aaj hum ko shoKH-baala de gaya

us but-e-paiman-gusil ko jab ki main lata hun ghar

kui nikoi de ke baala mujh ko tala de gaya

chaak-e-sina ko jigar ko dagh-e-dil ko dard-e-zaKHm

tajir-e-gham shahr-e-ulfat ke ye kala de gaya

kal ke din dikhla ke apna jalwa-e-sanat-gari

yaad apni shab ko wo bari-taala de gaya

nam apna japne ko har har tarah se har jagah

subha to masjid mein but-KHane mein mala de gaya