ji chahe kabe jao ji chahe but ko pujo

jī chāhe ka.abe jaao jī chāhe but ko puujo

ye sun rakho 'muhib' tum āshiq kabhū na huujo

ḳhuuñ sau diloñ kā hogā mashshāta terī gardan

zulfoñ kā us kī TuuTā shāne se ek mū jo

jis jā farishte ke par jalte hoñ paañv dharte

dil us galī meñ sar se shāyāñ hai jaa.e tū jo

ik-dam meñ dekh liijo phir jeb pāra-pāra

be-fā.eda hai nāseh kartā hai tū rafū jo

kis rashk-e-mehr-o-mah ke shā.eq haiñ dekhne ke

haiñ mehr-o-māh phirte din-rāt kū-ba-kū jo

pā kar tujhe halāvat kyā kyā uThāte haiñ vo

kuchh dil hī dil meñ terī karte haiñ justujū jo

kyā kyā na dāġh-e-hasrat sab dil hī dil meñ khāveñ

majlis meñ gul-ruḳhoñ kī aave vo sham.a-rū jo

taktā muqābil us ke kis rū se maah hove

garm-e-suḳhan ho zarra vo mehr-e-sho.ala-ḳhū jo

thī mauj āhū-e-chīñ aur sab habāb naafe

dariyā par us ne khole gesū-e-mushkbū jo

sail-e-sarishk mere pahuñche hai ġham meñ tere

gulzār meñ ravāñ hai ai gul ye āb-jū jo

gulshan meñ gar vo mai-kash aave sharāb piine

gul kā bhare piyāla ġhunche kī hai subū jo

kaale ke kāTne kī chaḌhtī hai lahr dil par

zulf-e-siyāh us kī yaad aa.e hai kabhū jo

ma.anī-shanās hī kuchh rutbe ko us ke samjhe

ik tarz kā hai apnā andāz-e-guftugū jo

āshiq na ham to hote par ai 'muhib' baġhal meñ

dil hai vo dushman-e-jāñ piitā rahe lahū jo

ji chahe kabe jao ji chahe but ko pujo

ye sun rakho 'muhib' tum aashiq kabhu na hujo

KHun sau dilon ka hoga mashshata teri gardan

zulfon ka us ki TuTa shane se ek mu jo

jis ja farishte ke par jalte hon panw dharte

dil us gali mein sar se shayan hai jae tu jo

ik-dam mein dekh lijo phir jeb para-para

be-faeda hai naseh karta hai tu rafu jo

kis rashk-e-mehr-o-mah ke shaeq hain dekhne ke

hain mehr-o-mah phirte din-raat ku-ba-ku jo

pa kar tujhe halawat kya kya uThate hain wo

kuchh dil hi dil mein teri karte hain justuju jo

kya kya na dagh-e-hasrat sab dil hi dil mein khawen

majlis mein gul-ruKHon ki aawe wo shama-ru jo

takta muqabil us ke kis ru se mah howe

garm-e-suKHan ho zarra wo mehr-e-shoala-KHu jo

thi mauj aahu-e-chin aur sab habab nafe

dariya par us ne khole gesu-e-mushkbu jo

sail-e-sarishk mere pahunche hai gham mein tere

gulzar mein rawan hai ai gul ye aab-ju jo

gulshan mein gar wo mai-kash aawe sharab pine

gul ka bhare piyala ghunche ki hai subu jo

kale ke kaTne ki chaDhti hai lahr dil par

zulf-e-siyah us ki yaad aae hai kabhu jo

mani-shanas hi kuchh rutbe ko us ke samjhe

ek tarz ka hai apna andaz-e-guftugu jo

aashiq na hum to hote par ai 'muhib' baghal mein

dil hai wo dushman-e-jaan pita rahe lahu jo