ji chahega jis ko use chaha na karenge

jī chāhegā jis ko use chāhā na kareñge

ham ishq o havas ko kabhī yakjā na kareñge

ai kaash chhuTeñ ahd-shikan ban ke jahāñ meñ

baaz aa.e vafādārī kā da.avā na kareñge

go husn-parastī na ho ḳhātir se farāmosh

ḳhush-qāmatoñ kā yaad sarāpā na kareñge

nargis kī shab-e-tīra meñ lūTeñge bahāreñ

par surmagīñ āñkhoñ kī tamannā na kareñge

bahlā.eñge sair-e-gul-o-shabnam se dil apnā

us āriz-e-gul-rañg kī parvā na kareñge

añgāroñ pe loTeñge par un shola-ruḳhoñ ke

nazzāra se ham aañkh bhī señkā na kareñge

ismat kā unheñ ḳhauf hai taqvā kā hameñ paas

ne kī hai kabhī ḳhvāhish-e-bejā na kareñge

bakne ke 'shahīdī' ke burā māniyo mat jaan

haiñ āshiq-e-sādiq kabhī aisā na kareñge

ji chahega jis ko use chaha na karenge

hum ishq o hawas ko kabhi yakja na karenge

ai kash chhuTen ahd-shikan ban ke jahan mein

baz aae wafadari ka dawa na karenge

go husn-parasti na ho KHatir se faramosh

KHush-qamaton ka yaad sarapa na karenge

nargis ki shab-e-tira mein luTenge bahaaren

par surmagin aankhon ki tamanna na karenge

bahlaenge sair-e-gul-o-shabnam se dil apna

us aariz-e-gul-rang ki parwa na karenge

angaron pe loTenge par un shola-ruKHon ke

nazzara se hum aankh bhi senka na karenge

ismat ka unhen KHauf hai taqwa ka hamein pas

ne ki hai kabhi KHwahish-e-beja na karenge

bakne ke 'shahidi' ke bura maniyo mat jaan

hain aashiq-e-sadiq kabhi aisa na karenge