ji DhunDhta hai ghar koi donon jahan se dur

jī DhūñDhtā hai ghar koī donoñ jahāñ se duur

is aap kī zamīñ se alag āsmāñ se duur

shāyad maiñ dar-ḳhur nigah-e-garm bhī nahīñ

bijlī taḌap rahī hai mire āshiyāñ se duur

āñkheñ churā ke aap ne afsāna kar diyā

jo haal thā zabāñ se qarīb aur bayāñ se duur

tā-arz-e-shauq meñ na rahe bandagī kī laag

ik sajda chāhtā huuñ tire āstāñ se duur

hai man.a rāh-e-ishq meñ dair-o-haram kā hosh

ya.anī kahāñ se paas hai manzil kahāñ se duur

ji DhunDhta hai ghar koi donon jahan se dur

is aap ki zamin se alag aasman se dur

shayad main dar-KHur nigah-e-garm bhi nahin

bijli taDap rahi hai mere aashiyan se dur

aankhen chura ke aap ne afsana kar diya

jo haal tha zaban se qarib aur bayan se dur

ta-arz-e-shauq mein na rahe bandagi ki lag

ek sajda chahta hun tere aastan se dur

hai mana rah-e-ishq mein dair-o-haram ka hosh

yani kahan se pas hai manzil kahan se dur