ji ko rog laga baiTha ji ke rog se marta hun

jī ko rog lagā baiThā jī ke rog se martā huuñ

is meñ kisī se shikva kyā apnī karnī bhartā huuñ

tark-e-gunāh ai vā.iz-jī dil se nahīñ majbūrī hai

aap ḳhudā se Darte haiñ maiñ duniyā se Dartā huuñ

duniyā se kuchh faiz na thā duniyā ko taj baiThā huuñ

allāh se ummīdeñ haiñ allāh allāh kartā huuñ

duur to haT jā.ūñ lekin fikr-e-mohabbat ne maarā

behad nāzuk rishta hai TuuT na jaa.e Dartā huuñ

kāvish-e-paiham āḳhir tak hāsil-e-marg-e-māyūsī

ye bhī koī jiinā hai kis jiine par martā huuñ

ji ko rog laga baiTha ji ke rog se marta hun

is mein kisi se shikwa kya apni karni bharta hun

tark-e-gunah ai waiz-ji dil se nahin majburi hai

aap KHuda se Darte hain main duniya se Darta hun

duniya se kuchh faiz na tha duniya ko taj baiTha hun

allah se ummiden hain allah allah karta hun

dur to haT jaun lekin fikr-e-mohabbat ne mara

behad nazuk rishta hai TuT na jae Darta hun

kawish-e-paiham aaKHir tak hasil-e-marg-e-mayusi

ye bhi koi jina hai kis jine par marta hun