ji mein hai ek din jhum kar us shoKH ko sajda karun

jī meñ hai ik din jhuum kar us shoḳh ko sajda karūñ

sajde se phir allāh tak ik rāsta paidā karūñ

bas ho chukā ahl-e-jahāñ ab ye tamāsha kab talak

kyā chashm-e-zāhir se milā kyā dīda-e-dil vā karūñ

haañ haañ vo bāzīgar sahī miTTī kā ik paikar sahī

terī nazar se ham-nashīñ kaise use dekhā karūñ

jaise kahīñ hai kuchh kamī tasvīr bantī hī nahīñ

arz-e-hunar meñ kab talak kilk-e-guhar toḌā karūñ

us se yahī kahtā huuñ vājib ehtirām-e-ishq hai

andar se ye ḳhvāhish hai vo jaisā kahe vaisā karūñ

ye jhilmilātā sā jahāñ gaahe ayaañ gaahe nihāñ

Thahre to kuchh ma.alūm ho dekhūñ to raaz ifshā karūñ

ji mein hai ek din jhum kar us shoKH ko sajda karun

sajde se phir allah tak ek rasta paida karun

bas ho chuka ahl-e-jahan ab ye tamasha kab talak

kya chashm-e-zahir se mila kya dida-e-dil wa karun

han han wo bazigar sahi miTTi ka ek paikar sahi

teri nazar se ham-nashin kaise use dekha karun

jaise kahin hai kuchh kami taswir banti hi nahin

arz-e-hunar mein kab talak kilk-e-guhar toDa karun

us se yahi kahta hun wajib ehtiram-e-ishq hai

andar se ye KHwahish hai wo jaisa kahe waisa karun

ye jhilmilata sa jahan gahe ayan gahe nihan

Thahre to kuchh malum ho dekhun to raaz ifsha karun