jina hai to jine ki pahli si ada mango

jiinā hai to jiine kī pahlī sī adā māñgo

fir.aun se Takrāo muusā se asā māñgo

har raah meñ ḳhud chhoḌo qadmoñ ke nishāñ apne

tauhīn hai ġhairoñ se naqsh-e-kaf-e-pā māñgo

māñgūñgā bahut kuchh maiñ sochā to ye thā lekin

lab ho ga.e patthar ke jab us ne kahā māñgo

rāzī-ba-razā rahnā hai sheva-e-ahl-e-dil

māñgo to bahar-sūrat marzi-e-ḳhudā māñgo

dar par kabhī ġhairoñ ke jo tum ko na jhukne de

taufīq-e-ilāhī se kuchh aisī anā māñgo

kis haal meñ rakkhā hai dekheñ to hameñ dil meñ

is sho.ala-e-rañgīñ se ā.īna zarā māñgo

mastī meñ 'tufail' us ne mujh ko ye duā dī thī

allāh kare puurī tum jo bhī duā māñgo

jina hai to jine ki pahli si ada mango

firaun se Takrao musa se asa mango

har rah mein KHud chhoDo qadmon ke nishan apne

tauhin hai ghairon se naqsh-e-kaf-e-pa mango

mangunga bahut kuchh main socha to ye tha lekin

lab ho gae patthar ke jab us ne kaha mango

raazi-ba-raza rahna hai shewa-e-ahl-e-dil

mango to bahar-surat marzi-e-KHuda mango

dar par kabhi ghairon ke jo tum ko na jhukne de

taufiq-e-ilahi se kuchh aisi ana mango

kis haal mein rakkha hai dekhen to hamein dil mein

is shoala-e-rangin se aaina zara mango

masti mein 'tufail' us ne mujh ko ye dua di thi

allah kare puri tum jo bhi dua mango