jina kya hai habab ho jaana

jiinā kyā hai habāb ho jaanā

ik haqīqat kā ḳhvāb ho jaanā

ishq hai silsila savāloñ kā

aur vafā lā-javāb ho jaanā

bārhā mahfiloñ ne dekhā hai

ḳhāmushī kā rabāb ho jaanā

ye karishma hai zar-navāzī kā

un kā tum se janāb ho jaanā

jumbish-e-fikr kī yahī had hai

bas azāb-o-savāb ho jaanā

jab vo gauhar-shanāsiyāñ na rahīñ

ai guhar phir se aab ho jaanā

tishnagī imtihān letī hai

ai nadī tū sarāb ho jaanā

uTh ga.ī is taraf nazar un kī

ai tamannā 'hijāb' ho jaanā

jina kya hai habab ho jaana

ek haqiqat ka KHwab ho jaana

ishq hai silsila sawalon ka

aur wafa la-jawab ho jaana

barha mahfilon ne dekha hai

KHamushi ka rabab ho jaana

ye karishma hai zar-nawazi ka

un ka tum se janab ho jaana

jumbish-e-fikr ki yahi had hai

bas azab-o-sawab ho jaana

jab wo gauhar-shanasiyan na rahin

ai guhar phir se aab ho jaana

tishnagi imtihan leti hai

ai nadi tu sarab ho jaana

uTh gai is taraf nazar un ki

ai tamanna 'hijab' ho jaana