jite ji bas wo but raha hamrah

jiite jī bas vo but rahā hamrāh

ab to bande ke hai ḳhudā hamrāh

dil diyā us ko par ye Dartā huuñ

dushman ik dost ke kiyā hamrāh

nahīñ yārān-e-raftagāñ kā nishāñ

le ga.e kyā ye naqsh-e-pā hamrāh

is meñ kyā aap kī hai rusvā.ī

rahe gar mujh sā pārsā hamrāh

tujhe dekhā jidhar nigāh ga.ī

thā tasavvur zi-bas tirā hamrāh

rañj-e-tanhā.ī-e-lahad na rahā

yaar ke ġham ko le liyā hamrāh

shab ko jaate ho saath lo mash'al

kahiye to ho ye dil-jalā hamrāh

hue baa'd apne bevafā 'ushshāq

le ga.e yaañ se ham-vafā hamrāh

terī raftār kā maiñ kushta huuñ

qabr tak aa.iyo zarā hamrāh

ye dil-e-bad-gumāñ na dekh sake

agar us but ke ho ḳhudā hamrāh

tā salāmat tū aa.e ai qāsid

Thahar itnā karūñ du'ā hamrāh

us ne tanhā mujhe na jaane diyā

ġham-e-furqat ko kar diyā hamrāh

nā-tavāñ hai bahut ġhubār mirā

tū zarā rahiyo ai sabā hamrāh

rahī yaañ gardish aur jāma-darī

kaash laate na dast-o-pā hamrāh

gāliyāñ jaise diiñ haiñ dil le kar

jā.egā ye diyā liyā hamrāh

jā na tanhā tū ai shah-e-ḳhūbāñ

ho 'vazīr'-e-barahna-pā hamrāh

jite ji bas wo but raha hamrah

ab to bande ke hai KHuda hamrah

dil diya us ko par ye Darta hun

dushman ek dost ke kiya hamrah

nahin yaran-e-raftagan ka nishan

le gae kya ye naqsh-e-pa hamrah

is mein kya aap ki hai ruswai

rahe gar mujh sa parsa hamrah

tujhe dekha jidhar nigah gai

tha tasawwur zi-bas tera hamrah

ranj-e-tanhai-e-lahad na raha

yar ke gham ko le liya hamrah

shab ko jate ho sath lo mash'al

kahiye to ho ye dil-jala hamrah

hue ba'd apne bewafa 'ushshaq

le gae yan se ham-wafa hamrah

teri raftar ka main kushta hun

qabr tak aaiyo zara hamrah

ye dil-e-bad-guman na dekh sake

agar us but ke ho KHuda hamrah

ta salamat tu aae ai qasid

Thahar itna karun du'a hamrah

us ne tanha mujhe na jaane diya

gham-e-furqat ko kar diya hamrah

na-tawan hai bahut ghubar mera

tu zara rahiyo ai saba hamrah

rahi yan gardish aur jama-dari

kash late na dast-o-pa hamrah

galiyan jaise din hain dil le kar

jaega ye diya liya hamrah

ja na tanha tu ai shah-e-KHuban

ho 'wazir'-e-barahna-pa hamrah