jite-ji kucha-e-dildar se jaya na gaya

jīte-jī kūcha-e-dildār se jaayā na gayā

us kī dīvār kā sar se mire saaya na gayā

kāv-kāve mizha-e-yār o dil-e-zār-o-nazār

guth ga.e aise shitābī ki chhuḌāyā na gayā

vo to kal der talak dekhtā īdhar ko rahā

ham se hī hāl-e-tabāh apnā dikhāyā na gayā

garm-rau rāh-e-fanā kā nahīñ ho saktā patañg

us se to sham.a-namat sar bhī kaTāyā na gayā

pās-e-nāmūs-e-mohabbat thā ki farhād ke paas

be-sutūñ sāmne se apne uThāyā na gayā

ḳhaak tak kūcha-e-dildār kī chhānī ham ne

justujū kī pe dil-e-gum-shuda paayā na gayā

ātish-e-tez judā.ī meñ yakāyak us bin

dil jalā yuuñ ki tanik jī bhī jalāyā na gayā

mah ne aa sāmne shab yaad dilāyā thā use

phir vo tā sub.h mire jī se bhulāyā na gayā

zer-e-shamshīr-e-sitam 'mīr' taḌapnā kaisā

sar bhī taslīm-e-mohabbat meñ hilāyā na gayā

jī meñ aatā hai ki kuchh aur bhī mauzūñ kiije

dard-e-dil ek ġhazal meñ to sunāyā na gayā

jite-ji kucha-e-dildar se jaya na gaya

us ki diwar ka sar se mere saya na gaya

kaw-kawe mizha-e-yar o dil-e-zar-o-nazar

guth gae aise shitabi ki chhuDaya na gaya

wo to kal der talak dekhta idhar ko raha

hum se hi haal-e-tabah apna dikhaya na gaya

garm-rau rah-e-fana ka nahin ho sakta patang

us se to shama-namat sar bhi kaTaya na gaya

pas-e-namus-e-mohabbat tha ki farhad ke pas

be-sutun samne se apne uThaya na gaya

KHak tak kucha-e-dildar ki chhani hum ne

justuju ki pe dil-e-gum-shuda paya na gaya

aatish-e-tez judai mein yakayak us bin

dil jala yun ki tanik ji bhi jalaya na gaya

mah ne aa samne shab yaad dilaya tha use

phir wo ta subh mere ji se bhulaya na gaya

zer-e-shamshir-e-sitam 'mir' taDapna kaisa

sar bhi taslim-e-mohabbat mein hilaya na gaya

ji mein aata hai ki kuchh aur bhi mauzun kije

dard-e-dil ek ghazal mein to sunaya na gaya