جن انکھڑیوں میں نہ تھا کچھ شرارتوں کے سوا

جن انکھڑیوں میں نہ تھا کچھ شرارتوں کے سوا

ان انکھڑیوں میں نہیں کچھ بھی حسرتوں کے سوا

لبوں پہ موج تبسم کا عہد بیت گیا

لبوں پہ آج نہیں کچھ شکایتوں کے سوا

وہ انجمن کا تصور کرے تو کیسے کرے

جسے نصیب نہ ہو کچھ بھی خلوتوں کے سوا

اک آئنہ ہوں جنون و خرد کا آئینہ

مری نظر میں نہیں کچھ بھی حیرتوں کے سوا

اسی سے پوچھ مرے انتظار کا عالم

جسے نہ کچھ بھی میسر ہو فرصتوں کے سوا

گداز ساغر و پیمانہ کون سمجھا ہے

مرے سوا مرے دل کی نزاکتوں کے سوا

کمی اسی میں تمنائیں جلوہ گر تھیں کمالؔ

کچھ آج دل میں نہیں ہے جراحتوں کے سوا