jin KHak ke zarron par wo saya-e-mahmil tha

jin ḳhaak ke zarroñ par vo sāya-e-mahmil thā

jo ḳhaak kā zarra thā vahshat-kada-e-dil thā

bedād kī har tah meñ sau tarah se shāmil thā

vo jaan kā dushman jo kahne ko mirā dil thā

ġham husn-e-mukammal thā dil hairat-e-kāmil thā

tasvīr kā ā.īna tasvīr ke qābil thā

ham jī se guzar jaanā āsān samajhte the

dekhā to mohabbat meñ ye kaam bhī mushkil thā

ā.īna-o-dil donoñ kahne hī kī bāteñ thiiñ

terī hī tajallī thī aur tū hī muqābil thā

har bātil-o-har-nāhaq ik rāz-e-haqīqat hai

jis shakl meñ haq aayā vābasta-e-bātil thā

haañ aap kisī ko yuuñ barbād nahīñ karte

ye 'fānī'-e-nākārā sach hai isī qābil thā

jin KHak ke zarron par wo saya-e-mahmil tha

jo KHak ka zarra tha wahshat-kada-e-dil tha

bedad ki har tah mein sau tarah se shamil tha

wo jaan ka dushman jo kahne ko mera dil tha

gham husn-e-mukammal tha dil hairat-e-kaamil tha

taswir ka aaina taswir ke qabil tha

hum ji se guzar jaana aasan samajhte the

dekha to mohabbat mein ye kaam bhi mushkil tha

aaina-o-dil donon kahne hi ki baaten thin

teri hi tajalli thi aur tu hi muqabil tha

har baatil-o-har-nahaq ek raaz-e-haqiqat hai

jis shakl mein haq aaya wabasta-e-baatil tha

han aap kisi ko yun barbaad nahin karte

ye 'fani'-e-nakara sach hai isi qabil tha