jin ki hasrat mein dil-e-ruswa ne gham khae bahut

jin kī hasrat meñ dil-e-rusvā ne ġham khaa.e bahut

sañg ham par in darīchoñ ne hī barsā.e bahut

raushnī ma.adūm gahre ho chale saa.e bahut

jaane kyuuñ tum aaj kī shab mujh ko yaad aa.e bahut

qismat-e-ahl-e-qafas phūloñ kī ḳhushbū bhī nahīñ

yuuñ to gulshan meñ sabā ne phuul mahkā.e bahut

log is ko bhī agar kahte haiñ to kah leñ bahār

muskurā.e kam shagūfe aur murjhā.e bahut

ek aañsū bhī gire to guuñj uThtī hai zamīñ

aaj to ham apnī tanhā.ī se ghabrā.e bahut

ek rasm-e-sarfaroshī thī so ruḳhsat ho ga.ī

yuuñ to dīvāne hamāre ba.ad bhī aa.e bahut

ishrat-e-hastī pe thī 'mahtāb' duniyā kī nazar

dil ko kyā kahiye ki us ne dard apnā.e bahut

jin ki hasrat mein dil-e-ruswa ne gham khae bahut

sang hum par in darichon ne hi barsae bahut

raushni madum gahre ho chale sae bahut

jaane kyun tum aaj ki shab mujh ko yaad aae bahut

qismat-e-ahl-e-qafas phulon ki KHushbu bhi nahin

yun to gulshan mein saba ne phul mahkae bahut

log is ko bhi agar kahte hain to kah len bahaar

muskurae kam shagufe aur murjhae bahut

ek aansu bhi gire to gunj uThti hai zamin

aaj to hum apni tanhai se ghabrae bahut

ek rasm-e-sarfaroshi thi so ruKHsat ho gai

yun to diwane hamare baad bhi aae bahut

ishrat-e-hasti pe thi 'mahtab' duniya ki nazar

dil ko kya kahiye ki us ne dard apnae bahut