jinko kuchh manzur rab ki dosti se kam nahin

jin ko kuchh manzūr rab kī dostī se kam nahīñ

maut bhī un ke liye to zindagī se kam nahīñ

ek ye bhī hai ibādat kā tarīqa dosto

ḳhidmat-e-ḳhalq-e-ḳhudā bhī bandagī se kam nahīñ

phir ḳhayāl aatā hai naḳhvat hai ḳhudā ko nā-pasand

jī meñ aatā to hai kah deñ ham kisī se kam nahīñ

sulh kā kyoñ rāsta karte nahīñ tum iḳhtiyār

dushmanoñ jab hone vaalī dushmanī se kam nahīñ

jis ko hāsil ho ga.ī vo sāhab-e-tauqīr hai

tere dar kī naukrī bhī afsarī se kam nahīñ

maan jā sham-e-mohabbat ko bujhā mat maan jā

ye ujālā sūrajoñ kī raushnī se kam nahīñ

sher kahnā shauq hai pesha nahīñ merā 'kamāl'

ishq vaise to mujhe bhī shā.irī se kam nahīñ

jin ko kuchh manzur rab ki dosti se kam nahin

maut bhi un ke liye to zindagi se kam nahin

ek ye bhi hai ibaadat ka tariqa dosto

KHidmat-e-KHalq-e-KHuda bhi bandagi se kam nahin

phir KHayal aata hai naKHwat hai KHuda ko na-pasand

ji mein aata to hai kah den hum kisi se kam nahin

sulh ka kyon rasta karte nahin tum iKHtiyar

dushmanon jab hone wali dushmani se kam nahin

jis ko hasil ho gai wo sahab-e-tauqir hai

tere dar ki naukri bhi afsari se kam nahin

man ja sham-e-mohabbat ko bujha mat man ja

ye ujala surajon ki raushni se kam nahin

sher kahna shauq hai pesha nahin mera 'kamal'

ishq waise to mujhe bhi shairi se kam nahin