jis aaine mein bhi jhanka nazar usi se mili

jis ā.īne meñ bhī jhāñkā nazar usī se milī

mujhe to apnī bhī yaaro ḳhabar usī se milī

badal badal ke chalā samt o rahguzar bhī magar

vo ik maqām ki har rahguzar usī se milī

ham aise koī hunar-mand bhī na the phir bhī

vo qadr-dāñ thā ki dād-e-hunar usī se milī

vo kaun haiñ jo banāte haiñ apnī duniyā ḳhud

hameñ to rone ko bhī chashm-e-tar usī se milī

ajab thā shaḳhs jo phirtā thā ḳhud banā talvār

chalī jo teġh to mujh ko sipar usī se milī

qadam qadam pe the raste meñ mah-vashoñ ke hujūm

milī kisī se to jā kar nazar usī se milī

na kisht-zāroñ meñ dekhā jise na bāġhoñ meñ

har ek fasl magar fasl par usī se milī

tamām umr gurezāñ rahā thā jis se maiñ

qadam lahad meñ jo rakkhe kamar usī se milī

basīrat-e-nigah-o-dil paḌī nahīñ miltī

milī jise bhī ye daulat 'umar' usī se milī

jis aaine mein bhi jhanka nazar usi se mili

mujhe to apni bhi yaro KHabar usi se mili

badal badal ke chala samt o rahguzar bhi magar

wo ek maqam ki har rahguzar usi se mili

hum aise koi hunar-mand bhi na the phir bhi

wo qadr-dan tha ki dad-e-hunar usi se mili

wo kaun hain jo banate hain apni duniya KHud

hamein to rone ko bhi chashm-e-tar usi se mili

ajab tha shaKHs jo phirta tha KHud bana talwar

chali jo tegh to mujh ko sipar usi se mili

qadam qadam pe the raste mein mah-washon ke hujum

mili kisi se to ja kar nazar usi se mili

na kisht-zaron mein dekha jise na baghon mein

har ek fasl magar fasl par usi se mili

tamam umr gurezan raha tha jis se main

qadam lahad mein jo rakkhe kamar usi se mili

basirat-e-nigah-o-dil paDi nahin milti

mili jise bhi ye daulat 'umar' usi se mili