jis din se hum junun ke hain daman lage hue

jis din se ham junūñ ke haiñ dāmāñ lage hue

dāman kī jā yahāñ haiñ garebāñ lage hue

allāh re qaid-ḳhāna-e-hastī ki dam ke saath

har ik qadam pe lākhoñ haiñ zindāñ lage hue

royā maiñ dekh marqad-e-majnūñ ko dhaaḌ maar

the jā-e-gul daraḳht-e-muġhīlāñ lage hue

baare chhuTe asīr-e-balā us galī meñ aaj

haiñ tūd-hā-e-ganj-e-shahīdāñ lage hue

yārān-e-pesh-rau zarā Thahro ki jyuuñ jaras

ham pīchhe pīchhe aate haiñ nālāñ lage hue

rakh soch kar qadam mirī vaadī meñ gard-e-bād

paañv se apne haiñ ye bayābāñ lage hue

koī to mere nāseh-e-dānā se ye kaho

dil chhūTte haiñ bātoñ meñ nādāñ lage hue

kyā din the vo bhī 'lutf' ki rahte the misl-e-zulf

kānoñ se us ke ham se pareshāñ lage hue

jis din se hum junun ke hain daman lage hue

daman ki ja yahan hain gareban lage hue

allah re qaid-KHana-e-hasti ki dam ke sath

har ek qadam pe lakhon hain zindan lage hue

roya main dekh marqad-e-majnun ko dhaD mar

the ja-e-gul daraKHt-e-mughilan lage hue

bare chhuTe asir-e-bala us gali mein aaj

hain tud-ha-e-ganj-e-shahidan lage hue

yaran-e-pesh-rau zara Thahro ki jyun jaras

hum pichhe pichhe aate hain nalan lage hue

rakh soch kar qadam meri wadi mein gard-e-baad

panw se apne hain ye bayaban lage hue

koi to mere naseh-e-dana se ye kaho

dil chhuTte hain baaton mein nadan lage hue

kya din the wo bhi 'lutf' ki rahte the misl-e-zulf

kanon se us ke hum se pareshan lage hue