jis din se haram ho gai hai

jis din se harām ho ga.ī hai

mai ḳhuld-maqām ho ga.ī hai

qaabū meñ hai un ke vasl kā din

jab aa.e haiñ shaam ho ga.ī hai

uftād-e-chaman ye hai ki bulbul

ḳhud hī tah-e-dām ho ga.ī hai

tauba se ghaTī ye qadr-o-qīmat

mai daam ke daam ho ga.ī hai

aatī hai qayāmat us galī meñ

pāmāl ḳhirām ho ga.ī hai

tauba se hamārī botal achchhī

jab TuuTī hai jaam ho ga.ī hai

kuchh zahr na thī sharāb-e-añgūr

kyā chiiz harām ho ga.ī hai

lab tak jo kabhī na aa.e vo aah

ūñchī so baam ho ga.ī hai

mai-nosh zarūr haiñ vo nā-ahl

jin par ye harām ho ga.ī hai

bujh bujh ke jalī thī qabr par sham.a

jal jal ke tamām ho ga.ī hai

aa jaa.e use jo aa.e mujh tak

maut un kā payām ho ga.ī hai

har baat meñ hoñTh par hai dushnām

ab husn-e-kalām ho ga.ī hai

sar ḳham hai haram meñ sū-e-taiba

kuchh ḳhū-e-salām ho ga.ī hai

daulat dil kī buto hai mahfūz

allāh ke naam ho ga.ī hai

phir phir ke nazar huī hai sadqe

jam kar ḳhat-e-jām ho ga.ī hai

hai duur abhī 'riyāz' manzil

din ḳhatm hai shaam ho ga.ī hai

jis din se haram ho gai hai

mai KHuld-maqam ho gai hai

qabu mein hai un ke wasl ka din

jab aae hain sham ho gai hai

uftad-e-chaman ye hai ki bulbul

KHud hi tah-e-dam ho gai hai

tauba se ghaTi ye qadr-o-qimat

mai dam ke dam ho gai hai

aati hai qayamat us gali mein

pamal KHiram ho gai hai

tauba se hamari botal achchhi

jab TuTi hai jam ho gai hai

kuchh zahr na thi sharab-e-angur

kya chiz haram ho gai hai

lab tak jo kabhi na aae wo aah

unchi so baam ho gai hai

mai-nosh zarur hain wo na-ahl

jin par ye haram ho gai hai

bujh bujh ke jali thi qabr par shama

jal jal ke tamam ho gai hai

aa jae use jo aae mujh tak

maut un ka payam ho gai hai

har baat mein honTh par hai dushnam

ab husn-e-kalam ho gai hai

sar KHam hai haram mein su-e-taiba

kuchh KHu-e-salam ho gai hai

daulat dil ki buto hai mahfuz

allah ke nam ho gai hai

phir phir ke nazar hui hai sadqe

jam kar KHat-e-jam ho gai hai

hai dur abhi 'riyaz' manzil

din KHatm hai sham ho gai hai