jis jagah daur-e-jam hota hai

jis jagah daur-e-jām hotā hai

vaañ ye aajiz mudām hotā hai

ham to ik harf ke nahīñ mamnūn

kaisā ḳhatt-o-payām hotā hai

teġh nākāmoñ pe na har dam khīñch

ik karishme meñ kaam hotā hai

pūchh mat aah āshiqoñ kī ma.āsh

roz un kā bhī shaam hotā hai

zaḳhm bin ġham bin aur ġhussa bin

apnā khānā harām hotā hai

shaiḳh kī sī hī shakl hai shaitān

jis pe shab ahtelām hotā hai

qatl ko maiñ kahā to uTh bolā

aaj kal sub.h-o-shām hotā hai

āḳhir ā.ūñgā na.ash par ab aah

ki ye āshiq tamām hotā hai

'mīr' sāhab bhī us ke haañ the par

jaise koī ġhulām hotā hai

jis jagah daur-e-jam hota hai

wan ye aajiz mudam hota hai

hum to ek harf ke nahin mamnun

kaisa KHatt-o-payam hota hai

tegh nakaamon pe na har dam khinch

ek karishme mein kaam hota hai

puchh mat aah aashiqon ki maash

roz un ka bhi sham hota hai

zaKHm bin gham bin aur ghussa bin

apna khana haram hota hai

shaiKH ki si hi shakl hai shaitan

jis pe shab ahtelam hota hai

qatl ko main kaha to uTh bola

aaj kal subh-o-sham hota hai

aaKHir aaunga nash par ab aah

ki ye aashiq tamam hota hai

'mir' sahab bhi us ke han the par

jaise koi ghulam hota hai