jis jagah jo KHush-nashin aaya nazar rahne diya

jis jagah jo ḳhush-nashīñ aayā nazar rahne diyā

ham ne raushan-dān meñ chiḌiyoñ kā ghar rahne diyā

mil ke jo bichhḌe unheñ jaane se rokā bhī nahīñ

aur jo saath aa.e un ko ham-safar rahne diyā

jis ke Dar kī karte phirte haiñ tijārat ahl-e-dīñ

ham ne us ke ḳhauf se larzīda shar rahne diyā

dard-e-dil ko bhī davāoñ se hī bahlāte rahe

bad-duāoñ ko hamesha be-asar rahne diyā

har sahar tujh ko bhulāne ke liye daftar gayā

aur tirī yādoñ ko mehmāñ raat bhar rahne diyā

jis meñ hāthoñ ko mire thāme nazar aate ho tum

bas usī tasvīr ko dīvār par rahne diyā

sab badal kar rakh diyā ham ne in āñkhoñ ke liye

haañ magar manzar-ba-manzar chashm-e-tar rahne diyā

jis jagah jo KHush-nashin aaya nazar rahne diya

hum ne raushan-dan mein chiDiyon ka ghar rahne diya

mil ke jo bichhDe unhen jaane se roka bhi nahin

aur jo sath aae un ko ham-safar rahne diya

jis ke Dar ki karte phirte hain tijarat ahl-e-din

hum ne us ke KHauf se larzida shar rahne diya

dard-e-dil ko bhi dawaon se hi bahlate rahe

bad-duaon ko hamesha be-asar rahne diya

har sahar tujh ko bhulane ke liye daftar gaya

aur teri yaadon ko mehman raat bhar rahne diya

jis mein hathon ko mere thame nazar aate ho tum

bas usi taswir ko diwar par rahne diya

sab badal kar rakh diya hum ne in aankhon ke liye

han magar manzar-ba-manzar chashm-e-tar rahne diya