jis ka hona mera hona banta hai

jis kā honā merā honā bantā hai

vo duniyā ke aage baunā bantā hai

ham to farz nibhāte haiñ majbūrī kā

hañsne kī buniyād khilaunā bantā hai

jis meñ apne paañv bhigo le vo ik baar

us dariyā kā paanī sonā bantā hai

ḳhāmoshī iz.hār meñ Dhal kar baat banī

hone kī buniyād na honā bantā hai

umroñ kī mazdūrī lagtī hai us par

lamhoñ meñ to vaqt kā konā bantā hai

maiñ dushman kī maut pe kaise raqs karūñ

merā to is dukh meñ ronā bantā hai

pahle us ko baaġh salāmī detā hai

baad meñ har ik phuul bichhaunā bantā hai

is parcham meñ badbū hai ġhaddārī kī

is parcham ko ḳhuun se dhonā bantā hai

auroñ kā to bār-e-garāñ hai maan liyā

apnā apnā bojh to Dhonā bantā hai

us kā jism november kā ḳhurshīd 'munīr'

us paikar kī dhuup meñ sonā bantā hai

jis ka hona mera hona banta hai

wo duniya ke aage bauna banta hai

hum to farz nibhate hain majburi ka

hansne ki buniyaad khilauna banta hai

jis mein apne panw bhigo le wo ek bar

us dariya ka pani sona banta hai

KHamoshi izhaar mein Dhal kar baat bani

hone ki buniyaad na hona banta hai

umron ki mazduri lagti hai us par

lamhon mein to waqt ka kona banta hai

main dushman ki maut pe kaise raqs karun

mera to is dukh mein rona banta hai

pahle us ko bagh salami deta hai

baad mein har ek phul bichhauna banta hai

is parcham mein badbu hai ghaddari ki

is parcham ko KHun se dhona banta hai

auron ka to bar-e-garan hai man liya

apna apna bojh to Dhona banta hai

us ka jism nowember ka KHurshid 'munir'

us paikar ki dhup mein sona banta hai