jis ka koi bhi nahin us ka KHuda hai yaro

jis kā koī bhī nahīñ us kā ḳhudā hai yaaro

maiñ nahīñ kahtā kitāboñ meñ likhā hai yaaro

muḌ ke dekhūñ to kidhar aur sadā duuñ to kise

mere maazī ne mujhe chhoḌ diyā hai yaaro

is sazā se to mirā jī hī nahīñ bhartā hai

zindagī kaise gunāhoñ kī sazā hai yaaro

shab hai is vaqt koī ghar na khulā pāoge

aao mai-ḳhāne kā darvāza khulā hai yaaro

koī kartā hai duā.eñ to ye jal jaatā hai

merā jīvan kisī mandir kā diyā hai yaaro

maiñ añdhere meñ rahūñ yā maiñ ujāle meñ rahūñ

aisā lagtā hai koī dekh rahā hai yaaro

haal kā zaḳhm to maazī se bahut gahrā hai

aaj zaḳhmī mirā saaya bhī huā hai yaaro

intizār aaj ke din kā thā baḌī muddat se

aaj us ne mujhe dīvāna kahā hai yaaro

jis ka koi bhi nahin us ka KHuda hai yaro

main nahin kahta kitabon mein likha hai yaro

muD ke dekhun to kidhar aur sada dun to kise

mere mazi ne mujhe chhoD diya hai yaro

is saza se to mera ji hi nahin bharta hai

zindagi kaise gunahon ki saza hai yaro

shab hai is waqt koi ghar na khula paoge

aao mai-KHane ka darwaza khula hai yaro

koi karta hai duaen to ye jal jata hai

mera jiwan kisi mandir ka diya hai yaro

main andhere mein rahun ya main ujale mein rahun

aisa lagta hai koi dekh raha hai yaro

haal ka zaKHm to mazi se bahut gahra hai

aaj zaKHmi mera saya bhi hua hai yaro

intizar aaj ke din ka tha baDi muddat se

aaj us ne mujhe diwana kaha hai yaro