jis ka mayassar na tha bhar ke nazar dekhna

jis kā mayassar na thā bhar ke nazar dekhnā

kahtā hai ḳhat aa.e par Tuk to idhar dekhnā

bolā vo hañs ke ki haañ dekhe haiñ tujh se bahut

maiñ jo kahā hai ġharaz mujh ko magar dekhnā

dekhūñ na vo din ki maiñ minnat-e-ehsān luuñ

shaam mirī ai falak ho na sahar dekhnā

roz-e-vidā.a us ko dekh ik do nazar sair ho

dekh le phir ham kahāñ aur kidhar dekhnā

yaar huā be-dimāġh sun mirā shor-e-junūñ

āh-o-fuġhāñ kā mirī yaaro asar dekhnā

jis kī tū dekhe hai raah merī nazar meñ hai ḳhuub

ik dam idhar dekhnā ik dam adhar dekhnā

itnā gayā-guzrā bhī mujh ko na vaañ se samajh

ġhair tū us kūche se phir to guzar dekhnā

ḳhilqat-e-ḳhūbāñ ke biich qubah-e-ḳhudā nikle hai

aib hai use munkiro husn agar dekhnā

dīda-e-bārīk-bīñ rāh-e-adam par ho juuñ

marg pe dil dharnā hai us kī kamar dekhnā

'hasrat' use dil-kushā jaise hai dariyā kī sair

mere lab-e-ḳhushk aur dīda-e-tar dekhnā

jis ka mayassar na tha bhar ke nazar dekhna

kahta hai KHat aae par Tuk to idhar dekhna

bola wo hans ke ki han dekhe hain tujh se bahut

main jo kaha hai gharaz mujh ko magar dekhna

dekhun na wo din ki main minnat-e-ehsan lun

sham meri ai falak ho na sahar dekhna

roz-e-widaa us ko dekh ek do nazar sair ho

dekh le phir hum kahan aur kidhar dekhna

yar hua be-dimagh sun mera shor-e-junun

aah-o-fughan ka meri yaro asar dekhna

jis ki tu dekhe hai rah meri nazar mein hai KHub

ek dam idhar dekhna ek dam adhar dekhna

itna gaya-guzra bhi mujh ko na wan se samajh

ghair tu us kuche se phir to guzar dekhna

KHilqat-e-KHuban ke bich qubah-e-KHuda nikle hai

aib hai use munkiro husn agar dekhna

dida-e-barik-bin rah-e-adam par ho jun

marg pe dil dharna hai us ki kamar dekhna

'hasrat' use dil-kusha jaise hai dariya ki sair

mere lab-e-KHushk aur dida-e-tar dekhna