jis ke talib hain wo matlub kahin baiTh raha

jis ke tālib haiñ vo matlūb kahīñ baiTh rahā

muntazir ham ko biThā ḳhuub kahīñ baiTh rahā

bas ki likkhī thī maiñ hālat dil-e-gum-gashta kī

kho ke qāsid mirā maktūb kahīñ baiTh rahā

dekheñ kyā aañkh uThā kar ki hameñ to nāhaq

aañkh dikhlā ke vo mahbūb kahīñ baiTh rahā

shaam se jaise nihāñ mahr ho so vasl kī raat

muñh chhupā kar vo is uslūb kahīñ baiTh rahā

hai mirī ḳhāna-nashīnī se ye ghar ghar mazkūr

ḳhail-e-ushshāq kā sarkūb kahīñ baiTh rahā

jaanā maiñ us kā na aanā ki samajh kar vo shoḳh

baiThne ko mire ma.ayūb kahīñ baiTh rahā

būd-o-bāsh apnī kaheñ kyā ki ab us bin yuuñ hai

jis tarah se koī majzūb kahīñ baiTh rahā

avval-e-ishq meñ sūrat ye banī 'jur.at' kī

ho ke āḳhir ko vo mahjūb kahīñ baiTh rahā

jis ke talib hain wo matlub kahin baiTh raha

muntazir hum ko biTha KHub kahin baiTh raha

bas ki likkhi thi main haalat dil-e-gum-gashta ki

kho ke qasid mera maktub kahin baiTh raha

dekhen kya aankh uTha kar ki hamein to nahaq

aankh dikhla ke wo mahbub kahin baiTh raha

sham se jaise nihan mahr ho so wasl ki raat

munh chhupa kar wo is uslub kahin baiTh raha

hai meri KHana-nashini se ye ghar ghar mazkur

KHail-e-ushshaq ka sarkub kahin baiTh raha

jaana main us ka na aana ki samajh kar wo shoKH

baiThne ko mere mayub kahin baiTh raha

bud-o-bash apni kahen kya ki ab us bin yun hai

jis tarah se koi majzub kahin baiTh raha

awwal-e-ishq mein surat ye bani 'jurat' ki

ho ke aaKHir ko wo mahjub kahin baiTh raha