jis ko aadat wasl ki ho hijr se kyunkar bane

jis ko aadat vasl kī ho hijr se kyūñkar bane

jab uThe ye ġham ki dil kā aa.ina patthar bane

ab jo vo banvā.eñ gahnā yaad rakhnā gul-farosh

phuul bach jaa.eñ to merī qabr kī chādar bane

ba.ad ārā.ish balā.eñ kaun legā mere ba.ad

yaad karnā mujh ko jab zulf-e-parī-paikar bane

hai tumhāre sāmne to jaan kā bachnā muhāl

tum se jab chhūTeñ to dekheñ ġhair se kyūñkar bane

donoñ āshiq tere aur donoñ kī yakjā būd-o-bāsh

merī jaañ jān-o-jigar meñ dekhiye kyūñkar bane

ārzū-mand-e-shahādat kī vasiyyat sab se hai

naam khodā jaa.e merā jab koī ḳhanjar bane

dil mushabbak ho gayā tīr-e-nigāh-ḳhāna se

ab tumhārī yaad ke aane ko lākhoñ ghar bane

ġhair se koī ta.alluq hī na rakh ai jañg-jū

gar bigaḌ mujh se bigaḌ jo kuchh bane mujh par bane

ḳhuftagān-e-ḳhāk chauñk uTThe chale kuchh aisī chaal

aaj to ai merī jaañ tum fitna-e-mahshar bane

chāhte ho tum rahūñ mar kar bhī maiñ qadmoñ se duur

kahte ho qabr us kī mere kūche se bāhar bane

mar ke bhī paa.eñ lab-e-sāqī kā bosa kyā majāl

vaañ na pahuñche gar hamārī ḳhaak kā sāġhar bane

dāman-e-qātil ke dhabboñ kī gavāhī ho zarūr

gar hamāre ḳhuun kā ai dosto mahzar bane

dil mujhe achchhā burā jaisā banāyā de diyā

sar to koī pūchhtā kaisā bane kyūñkar bane

qabr kā konā ho maskan dam nikal jaa.e 'rashīd'

ḳhāna-e-tan gir chuke jaldī ki apnā ghar bane

jis ko aadat wasl ki ho hijr se kyunkar bane

jab uThe ye gham ki dil ka aaina patthar bane

ab jo wo banwaen gahna yaad rakhna gul-farosh

phul bach jaen to meri qabr ki chadar bane

baad aaraish balaen kaun lega mere baad

yaad karna mujh ko jab zulf-e-pari-paikar bane

hai tumhaare samne to jaan ka bachna muhaal

tum se jab chhuTen to dekhen ghair se kyunkar bane

donon aashiq tere aur donon ki yakja bud-o-bash

meri jaan jaan-o-jigar mein dekhiye kyunkar bane

aarzu-mand-e-shahadat ki wasiyyat sab se hai

nam khoda jae mera jab koi KHanjar bane

dil mushabbak ho gaya tir-e-nigah-KHana se

ab tumhaari yaad ke aane ko lakhon ghar bane

ghair se koi talluq hi na rakh ai jang-ju

gar bigaD mujh se bigaD jo kuchh bane mujh par bane

KHuftagan-e-KHak chaunk uTThe chale kuchh aisi chaal

aaj to ai meri jaan tum fitna-e-mahshar bane

chahte ho tum rahun mar kar bhi main qadmon se dur

kahte ho qabr us ki mere kuche se bahar bane

mar ke bhi paen lab-e-saqi ka bosa kya majal

wan na pahunche gar hamari KHak ka saghar bane

daman-e-qatil ke dhabbon ki gawahi ho zarur

gar hamare KHun ka ai dosto mahzar bane

dil mujhe achchha bura jaisa banaya de diya

sar to koi puchhta kaisa bane kyunkar bane

qabr ka kona ho maskan dam nikal jae 'rashid'

KHana-e-tan gir chuke jaldi ki apna ghar bane