jis ko nasib iffat-e-qalb-o-nazar nahin

jis ko nasīb iffat-e-qalb-o-nazar nahīñ

āñkhoñ meñ laakh nuur sahī dīda-var nahīñ

husn-e-talab nahīñ kahīñ zauq-e-nazar nahīñ

varna vo āftāb kahāñ jalva-gar nahīñ

maanā ki tū hai mahram-e-rāz-e-nihāñ magar

apnī ḳhabar nahīñ hai to kuchh bhī ḳhabar nahīñ

maiñ ḳhud hī jazb-e-ishq pe qaabū na rakh sakā

tujh se to koī shikva mujhe chashm-e-tar nahīñ

hote haiñ bāryāb yahāñ sarfarosh hī

ye bārgāh-e-ishq hai ḳhāla kā ghar nahīñ

husn-e-nazar atā ho to har zarra tuur hai

kuchh bhī hasīñ nahīñ hai jo husn-e-nazar nahīñ

vo kyā ga.e ki ishq kī duniyā ujaḌ ga.ī

dīvār-o-dar nahīñ haiñ vo shām-o-sahar nahīñ

sun kar tire kalām ko vo ham-kalām hoñ

'sābir' tire kalām meñ itnā asar nahīñ

jis ko nasib iffat-e-qalb-o-nazar nahin

aankhon mein lakh nur sahi dida-war nahin

husn-e-talab nahin kahin zauq-e-nazar nahin

warna wo aaftab kahan jalwa-gar nahin

mana ki tu hai mahram-e-raaz-e-nihan magar

apni KHabar nahin hai to kuchh bhi KHabar nahin

main KHud hi jazb-e-ishq pe qabu na rakh saka

tujh se to koi shikwa mujhe chashm-e-tar nahin

hote hain baryab yahan sarfarosh hi

ye bargah-e-ishq hai KHala ka ghar nahin

husn-e-nazar ata ho to har zarra tur hai

kuchh bhi hasin nahin hai jo husn-e-nazar nahin

wo kya gae ki ishq ki duniya ujaD gai

diwar-o-dar nahin hain wo sham-o-sahar nahin

sun kar tere kalam ko wo ham-kalam hon

'sabir' tere kalam mein itna asar nahin