jis mein na ho sukun nasib aise jahan ko kya karun

jis meñ na ho sukūñ nasīb aise jahāñ ko kyā karūñ

rāhat-e-dil na ho jahāñ aise makāñ ko kyā karūñ

sub.h nasīm kī jagah bād-e-sumūm tund-o-tez

gul ke bajā.e ḳhaar haiñ bāġh-e-jahāñ ko kyā karūñ

va.ade hazār-hā kiye rahbar-e-qaum ne magar

va.ada koī vafā nahīñ aisī zabāñ ko kyā karūñ

tūtī-e-gul-adā nahīñ bulbul-e-ḳhush-navā nahīñ

kargas-o-zāġh hoñ jahāñ aise jahāñ ko kyā karūñ

va.ada pe jī rahā huuñ maiñ naak meñ aa gayā hai dam

zāhirī ġham ko kyā karūñ soz-e-nihāñ ko kyā karūñ

jitne bhī ḳhās-o-ām haiñ zar ke sabhī ġhulām haiñ

kyā kahūñ mīr-e-vaqt ko pīr-e-muġhāñ ko kyā karūñ

bar-sar-e-manzil-e-murād dhoke diye haiñ qaum ko

ye to batāo fitrat-e-rāhbarāñ ko kyā karūñ

jis mein na ho sukun nasib aise jahan ko kya karun

rahat-e-dil na ho jahan aise makan ko kya karun

subh nasim ki jagah baad-e-sumum tund-o-tez

gul ke bajae KHar hain bagh-e-jahan ko kya karun

wade hazar-ha kiye rahbar-e-qaum ne magar

wada koi wafa nahin aisi zaban ko kya karun

tuti-e-gul-ada nahin bulbul-e-KHush-nawa nahin

kargas-o-zagh hon jahan aise jahan ko kya karun

wada pe ji raha hun main nak mein aa gaya hai dam

zahiri gham ko kya karun soz-e-nihan ko kya karun

jitne bhi KHas-o-am hain zar ke sabhi ghulam hain

kya kahun mir-e-waqt ko pir-e-mughan ko kya karun

bar-sar-e-manzil-e-murad dhoke diye hain qaum ko

ye to batao fitrat-e-rahbaran ko kya karun