jis mein na KHushi ho wo mohabbat nahin achchhi

jis meñ na ḳhushī ho vo mohabbat nahīñ achchhī

kulfat se jo ḳhālī ho vo rāhat nahīñ achchhī

kahtā hai hasīnoñ kī mohabbat nahīñ achchhī

aur nāseh-e-kam-fahm ye aadat nahīñ achchhī

tum par jo na aa jaa.e to vo dil nahīñ achchhā

tum par jo na maa.il ho tabī.at nahīñ achchhī

be-dil liye dete ho jo tum ġhairoñ ko bose

nuqsān hai is meñ ye muravvat nahīñ achchhī

dilvā.eñ mujhe gāliyāñ ġhairoñ se sar-e-bazm

o shoḳh ye dar-parda sharārat nahīñ achchhī

dīvāne nahīñ ham jo giraftār-e-balā hoñ

vāqif haiñ ki in zulfoñ kī ulfat nahīñ achchhī

'sābir' ne sar-e-bazm jo chheḌā to vo bole

kambaḳht yahī to tirī aadat nahīñ achchhī

'sābir' shajar-e-ḳhushk se ummīd-e-samar kyā

jo faiz se ḳhālī ho vo ḳhidmat nahīñ achchhī

jis mein na KHushi ho wo mohabbat nahin achchhi

kulfat se jo KHali ho wo rahat nahin achchhi

kahta hai hasinon ki mohabbat nahin achchhi

aur naseh-e-kam-fahm ye aadat nahin achchhi

tum par jo na aa jae to wo dil nahin achchha

tum par jo na mail ho tabiat nahin achchhi

be-dil liye dete ho jo tum ghairon ko bose

nuqsan hai is mein ye murawwat nahin achchhi

dilwaen mujhe galiyan ghairon se sar-e-bazm

o shoKH ye dar-parda shararat nahin achchhi

diwane nahin hum jo giraftar-e-bala hon

waqif hain ki in zulfon ki ulfat nahin achchhi

'sabir' ne sar-e-bazm jo chheDa to wo bole

kambaKHt yahi to teri aadat nahin achchhi

'sabir' shajar-e-KHushk se ummid-e-samar kya

jo faiz se KHali ho wo KHidmat nahin achchhi