jis ne teri bebak ada ko nahin dekha

jis ne tirī bebāk adā ko nahīñ dekhā

vallāh ki āñkhoñ se fazā ko nahīñ dekhā

kyuuñ mujh ko sunā.e na bhalā qissa-e-jannat

vaa.iz ne tire mehr-o-vafā ko nahīñ dekhā

afsos ki sun hī ke abhī hañste ho afsos

tum ne jo agar āh-o-bukā ko nahīñ dekhā

ghabrā.e hue phirtī hai kyuuñ mere tarah se

tāsīr ne kyā merī duā ko nahīñ dekhā

bebākiyāñ dekhīñ haiñ tirī bazm-e-adū meñ

āñkhoñ meñ tirī sharm-o-hayā ko nahīñ dekhā

kahte haiñ ġhalat hovegā dushman kā guzar ḳhaak

kūche meñ tire bād-e-sabā ko nahīñ dekhā

ma.alūm nahīñ tum ko vafā kahte haiñ kis ko

tum ne abhī arbāb-e-vafā ko nahīñ dekhā

kyā ḳhaak ho ummīd mujhe us se vafā kī

maiñ ne to kabhī us kī jafā ko nahīñ dekhā

nāzāñ na hoñ kyuuñ ḳhizar bhalā umr pe apnī

hazrat ne tirā zulf-e-rasā ko nahīñ dekhā

parde se nikalte nahīñ aur kahte haiñ mujh se

pahchānoge kyā ham ko ḳhudā ko nahīñ dekhā

aage tirī āñkhoñ ke jhukā.e hue āñkheñ

kab āhu-e-bāvar-ba-ḳhatā ko nahīñ dekhā

kyuuñ hazrat-e-mūsā kī tarah na.ash meñ 'nassāḳh'

gar tum ne but-e-hosh-rubā ko nahīñ dekhā

jis ne teri bebak ada ko nahin dekha

wallah ki aankhon se faza ko nahin dekha

kyun mujh ko sunae na bhala qissa-e-jannat

waiz ne tere mehr-o-wafa ko nahin dekha

afsos ki sun hi ke abhi hanste ho afsos

tum ne jo agar aah-o-buka ko nahin dekha

ghabrae hue phirti hai kyun mere tarah se

tasir ne kya meri dua ko nahin dekha

bebakiyan dekhin hain teri bazm-e-adu mein

aankhon mein teri sharm-o-haya ko nahin dekha

kahte hain ghalat howega dushman ka guzar KHak

kuche mein tere baad-e-saba ko nahin dekha

malum nahin tum ko wafa kahte hain kis ko

tum ne abhi arbab-e-wafa ko nahin dekha

kya KHak ho ummid mujhe us se wafa ki

main ne to kabhi us ki jafa ko nahin dekha

nazan na hon kyun KHizar bhala umr pe apni

hazrat ne tera zulf-e-rasa ko nahin dekha

parde se nikalte nahin aur kahte hain mujh se

pahchanoge kya hum ko KHuda ko nahin dekha

aage teri aankhon ke jhukae hue aankhen

kab aahu-e-bawar-ba-KHata ko nahin dekha

kyun hazrat-e-musa ki tarah nash mein 'nassaKH'

gar tum ne but-e-hosh-ruba ko nahin dekha