jis qadar shikwe the sab harf-e-dua hone lage

jis qadar shikve the sab harf-e-duā hone lage

ham kisī kī aarzū meñ kyā se kyā hone lage

bekasī ne be-zabānī ko zabāñ kyā baḳhsh dī

jo na kah sakte the ashkoñ se adā hone lage

ham zamāne kī suḳhan-fahmī kā shikva kyā kareñ

jab zarā sī baat par tum bhī ḳhafā hone lage

rañg-e-mahfil dekh kar duniyā ne nazreñ pher liiñ

āshnā jitne bhī the nā-āshnā hone lage

har qadam par manzileñ kuchh duur yuuñ hotī ga.iiñ

rāz-hā-e-zindagānī ham pe vā hone lage

sar-burīda ḳhasta-sāmāñ dil-shikasta jāñ-ba-lab

āshiqī meñ surḳh-rū nām-e-ḳhudā hone lage

āgahī ne jab dikhā.ī rāh-e-irfān-e-habīb

but the jitne dil meñ sab qibla-numā hone lage

āshiqī kī ḳhair ho 'sarvar' ki ab is shahr meñ

vaqt vo aayā hai bande bhī ḳhudā hone lage

jis qadar shikwe the sab harf-e-dua hone lage

hum kisi ki aarzu mein kya se kya hone lage

bekasi ne be-zabani ko zaban kya baKHsh di

jo na kah sakte the ashkon se ada hone lage

hum zamane ki suKHan-fahmi ka shikwa kya karen

jab zara si baat par tum bhi KHafa hone lage

rang-e-mahfil dekh kar duniya ne nazren pher lin

aashna jitne bhi the na-ashna hone lage

har qadam par manzilen kuchh dur yun hoti gain

raaz-ha-e-zindagani hum pe wa hone lage

sar-burida KHasta-saman dil-shikasta jaan-ba-lab

aashiqi mein surKH-ru nam-e-KHuda hone lage

aagahi ne jab dikhai rah-e-irfan-e-habib

but the jitne dil mein sab qibla-numa hone lage

aashiqi ki KHair ho 'sarwar' ki ab is shahr mein

waqt wo aaya hai bande bhi KHuda hone lage