jis rah se bhi guzar gae hum

jis raah se bhī guzar ga.e ham

har dil ko gudāz kar ga.e ham

jalve the kisī ke kār-farmā

har naqsh meñ rañg bhar ga.e ham

kyā jāniye kyā thā us nazar meñ

uljhe to sañvar sañvar ga.e ham

ham bhāñp ga.e the rañg-e-mahfil

kahne ko to be-ḳhabar ga.e ham

har dil thā udāsiyoñ kā ma.abad

har gaam Thahar Thahar ga.e ham

be-mehrī-e-dost talḳhi-e-zīst

kis kis se nibāh kar ga.e ham

ummīd-e-vafā pe jiine vaalo

ummīd-e-vafā meñ mar ga.e ham

jis rah se bhi guzar gae hum

har dil ko gudaz kar gae hum

jalwe the kisi ke kar-farma

har naqsh mein rang bhar gae hum

kya jaaniye kya tha us nazar mein

uljhe to sanwar sanwar gae hum

hum bhanp gae the rang-e-mahfil

kahne ko to be-KHabar gae hum

har dil tha udasiyon ka mabad

har gam Thahar Thahar gae hum

be-mehri-e-dost talKHi-e-zist

kis kis se nibah kar gae hum

ummid-e-wafa pe jine walo

ummid-e-wafa mein mar gae hum