jis taraf se bhi milawaT ki rasad hai rad hai

jis taraf se bhī milāvaT kī rasad hai rad hai

ek rattī bhī agar ḳhvāhish-e-bad hai rad hai

dukh diye haiñ zar-e-ḳhālis kī parakh ne lekin

jis ta.alluq meñ kahīñ kīna-o-kad hai rad hai

amn likhnā nahīñ sīkheñ jinheñ paḌh kar bachche

un kitāboñ pe kisī kī bhī sanad hai rad hai

jab chaḌhā.ī pe mirā haath na thāmā tū ne

ab ye choTī pe jo be-faiz madad hai rad hai

is lagāvaT bhare lahje kī jagah hai dil meñ

tahniyat meñ jo riyā aur hasad hai rad hai

apnī sarhad kī hifāzat pe hai īmān magar

zindagī aur mohabbat pe jo had hai rad hai

us se kahnā ki ye tardīd koī khel nahīñ

jo mirī baat ko dohrā.e ki rad hai rad hai

jis taraf se bhi milawaT ki rasad hai rad hai

ek ratti bhi agar KHwahish-e-bad hai rad hai

dukh diye hain zar-e-KHalis ki parakh ne lekin

jis talluq mein kahin kina-o-kad hai rad hai

amn likhna nahin sikhen jinhen paDh kar bachche

un kitabon pe kisi ki bhi sanad hai rad hai

jab chaDhai pe mera hath na thama tu ne

ab ye choTi pe jo be-faiz madad hai rad hai

is lagawaT bhare lahje ki jagah hai dil mein

tahniyat mein jo riya aur hasad hai rad hai

apni sarhad ki hifazat pe hai iman magar

zindagi aur mohabbat pe jo had hai rad hai

us se kahna ki ye tardid koi khel nahin

jo meri baat ko dohrae ki rad hai rad hai