jis tarah dhup ka rangat pe asar paDta hai

jis tarah dhuup kā rañgat pe asar paḌtā hai

nafs kā vaise ibādat pe asar paḌtā hai

aise mujh par bhī tire ġham ke nishāñ dikhte haiñ

jaise mausam kā imārat pe asar paḌtā hai

sirf māhaul se fikreñ nahīñ badlā kartīñ

dostoñ kā bhī tabī.at pe asar paḌtā hai

dushmanoñ se hī nahīñ hotā hai ḳhatra lāhiq

bāġhiyoñ se bhī hukūmat pe asar paḌtā hai

ab samajh aayā sabab mujh ko mirī pastī kā

maañg ghaTtī hai to qīmat pe asar paḌtā hai

bhuuk nekī kī lage yā ki lage duniyā kī

bhuuk lagtī hai to sūrat pe asar paḌtā hai

rizq ruktā hai namāzoñ ke qazā karne se

niyyateñ bad hoñ to barakat pe asar paḌtā hai

saaf dikhtī hai buḌhāpe meñ qazā sach to hai

umr ke saath basīrat pe asar paḌtā hai

paas rahne se hī baḌhtī nahīñ chāhat 'mohsin'

fāsloñ se bhī mohabbat pe asar paḌtā hai

jis tarah dhup ka rangat pe asar paDta hai

nafs ka waise ibaadat pe asar paDta hai

aise mujh par bhi tere gham ke nishan dikhte hain

jaise mausam ka imarat pe asar paDta hai

sirf mahaul se fikren nahin badla kartin

doston ka bhi tabiat pe asar paDta hai

dushmanon se hi nahin hota hai KHatra lahiq

baghiyon se bhi hukumat pe asar paDta hai

ab samajh aaya sabab mujh ko meri pasti ka

mang ghaTti hai to qimat pe asar paDta hai

bhuk neki ki lage ya ki lage duniya ki

bhuk lagti hai to surat pe asar paDta hai

rizq rukta hai namazon ke qaza karne se

niyyaten bad hon to barakat pe asar paDta hai

saf dikhti hai buDhape mein qaza sach to hai

umr ke sath basirat pe asar paDta hai

pas rahne se hi baDhti nahin chahat 'mohsin'

faslon se bhi mohabbat pe asar paDta hai