jis tarah do-jahan mein KHuda ka nahin sharik

jis tarah do-jahāñ meñ ḳhudā kā nahīñ sharīk

tere jamāl meñ nahīñ koī hasīñ sharīk

maiñ bhī tirā fidā.ī huuñ mujh pe bhī rahm khā

jab tak hai is gumān meñ kuchh kuchh yaqīñ sharīk

us ke sitam hī kam haiñ jo auroñ kā naam luuñ

hai āsmāñ sharīk na is meñ zamīñ sharīk

roz-e-jazā umiid hai sab ko sazā mile

iqdām-e-qatl meñ haiñ mire sab hasīñ sharīk

ai badr terā da.avā-e-yaktā.ī sab ġhalat

jumla sifāt meñ hai tire vo jabīñ sharīk

sach pūchhiye to jān-e-jahāñ mere qatl meñ

tirchhī nazar ke saath hī chīn-e-jabīñ sharīk

vā'iz tū bāġh-e-husn kī ik baar sair kar

mumkin hai dilkashī meñ ho ḳhuld-e-barīñ sharīk

kyā vaj.h tere zulm-o-sitam meñ mazā nahīñ

ai daur-e-charḳh aaj vo shāyad nahīñ sharīk

bhejā payām-e-jalsa to andāz se kahā

'arsa huā ki ham nahīñ hote kahīñ sharīk

'parvīñ' ġhalat hai un ko samajhnā judā judā

haiñ jism-o-jāñ kī tarah se duniyā-o-dīñ sharīk

jis tarah do-jahan mein KHuda ka nahin sharik

tere jamal mein nahin koi hasin sharik

main bhi tera fidai hun mujh pe bhi rahm kha

jab tak hai is guman mein kuchh kuchh yaqin sharik

us ke sitam hi kam hain jo auron ka nam lun

hai aasman sharik na is mein zamin sharik

roz-e-jaza umid hai sab ko saza mile

iqdam-e-qatl mein hain mere sab hasin sharik

ai badr tera dawa-e-yaktai sab ghalat

jumla sifat mein hai tere wo jabin sharik

sach puchhiye to jaan-e-jahan mere qatl mein

tirchhi nazar ke sath hi chin-e-jabin sharik

wa'iz tu bagh-e-husn ki ek bar sair kar

mumkin hai dilkashi mein ho KHuld-e-barin sharik

kya wajh tere zulm-o-sitam mein maza nahin

ai daur-e-charKH aaj wo shayad nahin sharik

bheja payam-e-jalsa to andaz se kaha

'arsa hua ki hum nahin hote kahin sharik

'parwin' ghalat hai un ko samajhna juda juda

hain jism-o-jaan ki tarah se duniya-o-din sharik