jise log kahte hain tirgi wahi shab hijab-e-sahar bhi hai

jise log kahte haiñ tīrgī vahī shab hijāb-e-sahar bhī hai

jinheñ be-ḳhudī-e-fanā milī unheñ zindagī kī ḳhabar bhī hai

tire ahl-e-dīd ko dekh ke kabhī khul sakā hai ye raaz bhī

unheñ jis ne ahl-e-nazar kiyā vo tirā ḳharāb-e-nazar bhī hai

ye visāl-o-hijr kī bahs kyā ki ajiib chiiz hai ishq bhī

tujhe pā ke hai vahī dard-e-dil vahī rañg-e-zaḳhm-e-jigar bhī hai

ye nasīb-e-ishq kī gardisheñ ki zamāñ makāñ se guzar ke bhī

vahī āsmāñ vahī shām-e-ġham vahī shām-e-ġham kī sahar bhī hai

tire kaif-e-husn kī jaan hai mirī be-dilī-o-fasurdagī

jise kahte haiñ ġham-e-rā.egāñ vo liye hue kuchh asar bhī hai

na rahā hayāt kī manziloñ meñ vo farq-e-nāz-o-niyāz bhī

ki jahāñ hai ishq barahna-pā vahīñ husn ḳhāk-basar bhī hai

vo ġham-e-firāq bhī kaT gayā vo malāl ishq bhī miT gayā

magar aaj bhī tire haath meñ vahī āstīñ hai ki tar bhī hai

dam-e-hashr azal kī bhī yaad kar ye zabān kyā ye nigāh kyā

jo kisī se aaj na ho sakā vo savāl bār-e-digar bhī hai

jo visāl-o-hijr se duur hai jo karam sitam se hai be-ḳhabar

kuchh uThā huā hai vo dard bhī kuchh uThī huī vo nazar bhī hai

ye pata hai us kī ināyatoñ ne ḳharāb kitnoñ ko kar diyā

ye ḳhabar hai nargis-e-nīm-vā ki girah meñ fitna-e-shar bhī hai

usī shām-e-marg kī tīrgī meñ haiñ jalva-hā-e-hayāt bhī

unhīñ zulmatoñ ke hijāb meñ ye chamak ye raqs-e-sharar bhī hai

vahī dard bhī hai davā bhī hai vahī maut bhī hai hayāt bhī

vahī ishq nāvak-e-nāz hai vahī ishq sīna-sipar bhī hai

tū zamāñ makāñ se guzar bhī jā tū rah-e-adam ko bhī kaaT le

vo savāb ho ki azaab ho kahīñ zindagī se mafar bhī hai

jo gale tak aa ke aTak gayā jise talḳh-kām na pī sake

vo lahū kā ghūñT utar gayā to sunā hai shīr-o-shakar bhī hai

koī ahl-e-dil ko kamī nahīñ magar ahl-e-dil kā ye qaul hai

abhī maut bhī nahīñ mil sakī abhī zindagī meñ kasar bhī hai

baḌī chiiz daulat-o-jāh hai baḌī vus.ateñ haiñ nasīb use

magar ahl-e-daulat-o-jāh meñ kahīñ aadmī kā guzar bhī hai

ye shab-e-darāz bhī kaT ga.ī vo sitāre Duube vo pau phaTī

sar-e-rāh ġhaflat-e-ḳhvāb se ab uTho ki vaqt-e-sahar bhī hai

jo ulaT chuke haiñ bisāt-e-dahr ko agle vaqtoñ meñ bārhā

vahī aaj gardish-e-baḳht hai vahī rañg-e-daur-e-qamar bhī hai

na ġham-e-azāb-o-savāb se kabhī chheḌ fitrat-e-ishq ko

jo azal se mast-nigāh hai use nek-o-bad kī ḳhabar bhī hai

vo tamām shukr-o-razā sahī vo tamām sabr-o-sukūñ sahī

tū hai jis se mā.il-e-imtihāñ vo farishta hai to bashar bhī hai

na kaho taġhāful-e-husn se koī kār-sāzī-e-ġham kare

ki jo aaj ġham se nikal ga.ī vo duā ḳharāb asar bhī hai

tire ġham kī umr-e-darāz meñ ka.ī inqalāb hue magar

vahī tūl-e-shām-e-'firāq' hai vahī intizār-e-sahar bhī hai

jise log kahte hain tirgi wahi shab hijab-e-sahar bhi hai

jinhen be-KHudi-e-fana mili unhen zindagi ki KHabar bhi hai

tere ahl-e-did ko dekh ke kabhi khul saka hai ye raaz bhi

unhen jis ne ahl-e-nazar kiya wo tera KHarab-e-nazar bhi hai

ye visal-o-hijr ki bahs kya ki ajib chiz hai ishq bhi

tujhe pa ke hai wahi dard-e-dil wahi rang-e-zaKHm-e-jigar bhi hai

ye nasib-e-ishq ki gardishen ki zaman makan se guzar ke bhi

wahi aasman wahi sham-e-gham wahi sham-e-gham ki sahar bhi hai

tere kaif-e-husn ki jaan hai meri be-dili-o-fasurdagi

jise kahte hain gham-e-raegan wo liye hue kuchh asar bhi hai

na raha hayat ki manzilon mein wo farq-e-naz-o-niyaz bhi

ki jahan hai ishq barahna-pa wahin husn KHak-basar bhi hai

wo gham-e-firaq bhi kaT gaya wo malal ishq bhi miT gaya

magar aaj bhi tere hath mein wahi aastin hai ki tar bhi hai

dam-e-hashr azal ki bhi yaad kar ye zaban kya ye nigah kya

jo kisi se aaj na ho saka wo sawal bar-e-digar bhi hai

jo visal-o-hijr se dur hai jo karam sitam se hai be-KHabar

kuchh uTha hua hai wo dard bhi kuchh uThi hui wo nazar bhi hai

ye pata hai us ki inayaton ne KHarab kitnon ko kar diya

ye KHabar hai nargis-e-nim-wa ki girah mein fitna-e-shar bhi hai

usi sham-e-marg ki tirgi mein hain jalwa-ha-e-hayat bhi

unhin zulmaton ke hijab mein ye chamak ye raqs-e-sharar bhi hai

wahi dard bhi hai dawa bhi hai wahi maut bhi hai hayat bhi

wahi ishq nawak-e-naz hai wahi ishq sina-sipar bhi hai

tu zaman makan se guzar bhi ja tu rah-e-adam ko bhi kaT le

wo sawab ho ki azab ho kahin zindagi se mafar bhi hai

jo gale tak aa ke aTak gaya jise talKH-kaam na pi sake

wo lahu ka ghunT utar gaya to suna hai shir-o-shakar bhi hai

koi ahl-e-dil ko kami nahin magar ahl-e-dil ka ye qaul hai

abhi maut bhi nahin mil saki abhi zindagi mein kasar bhi hai

baDi chiz daulat-o-jah hai baDi wusaten hain nasib use

magar ahl-e-daulat-o-jah mein kahin aadmi ka guzar bhi hai

ye shab-e-daraaz bhi kaT gai wo sitare Dube wo pau phaTi

sar-e-rah ghaflat-e-KHwab se ab uTho ki waqt-e-sahar bhi hai

jo ulaT chuke hain bisat-e-dahr ko agle waqton mein barha

wahi aaj gardish-e-baKHt hai wahi rang-e-daur-e-qamar bhi hai

na gham-e-azab-o-sawab se kabhi chheD fitrat-e-ishq ko

jo azal se mast-nigah hai use nek-o-bad ki KHabar bhi hai

wo tamam shukr-o-raza sahi wo tamam sabr-o-sukun sahi

tu hai jis se mail-e-imtihan wo farishta hai to bashar bhi hai

na kaho taghaful-e-husn se koi kar-sazi-e-gham kare

ki jo aaj gham se nikal gai wo dua KHarab asar bhi hai

tere gham ki umr-e-daraaz mein kai inqalab hue magar

wahi tul-e-sham-e-'firaq' hai wahi intizar-e-sahar bhi hai