jise maine subh samajh liya kahin ye bhi sham-e-alam na ho

jise maiñ ne sub.h samajh liyā kahīñ ye bhī shām-e-alam na ho

mire sar kī aap ne khaa.ī jo kahīñ ye bhī jhūTī qasam na ho

vo jo muskurā.e haiñ be-sabab ye karam bhī un kā sitam na ho

maiñ ne pyaar jis ko samajh liyā kahīñ ye bhī merā bharam na ho

tū jo hasb-e-va.ada na aa sakā to bahānā aisā nayā banā

ki tirā vaqār bhī kam na ho mirā e.atibār bhī kam na ho

jise dekh kar maiñ ThiThak ga.ī use aur ġhaur se dekh luuñ

ye chamak rahā hai jo aa.ina kahīñ terā naqsh-e-qadam na ho

mire muñh se niklā ye barmalā tujhe shaad kāmrāñ rakhe ḳhudā

tū payām laayā hai yaar kā tirī umr ḳhizr se kam na ho

jise main ne subh samajh liya kahin ye bhi sham-e-alam na ho

mere sar ki aap ne khai jo kahin ye bhi jhuTi qasam na ho

wo jo muskurae hain be-sabab ye karam bhi un ka sitam na ho

main ne pyar jis ko samajh liya kahin ye bhi mera bharam na ho

tu jo hasb-e-wada na aa saka to bahana aisa naya bana

ki tera waqar bhi kam na ho mera eatibar bhi kam na ho

jise dekh kar main ThiThak gai use aur ghaur se dekh lun

ye chamak raha hai jo aaina kahin tera naqsh-e-qadam na ho

mere munh se nikla ye barmala tujhe shad kaamran rakhe KHuda

tu payam laya hai yar ka teri umr KHizr se kam na ho