jise sunaoge pahle hi sun chuka hoga

jise sunāoge pahle hī sun chukā hogā

mujhe yaqīn hai ye aisā vāqi.a hogā

yahāñ to ab bhī haiñ tanhā.iyāñ javāb-talab

vo pahle-pahl yahāñ kis tarah rahā hogā

jo aaj tak huā kuchh kuchh samajh meñ aatā hai

koī batā.e yahāñ is ke ba.ad kyā hogā

ḳhalā meñ pā.eñge taarā jo duur tak nikleñ

phir is ke ba.ad bahut duur tak ḳhalā hogā

samajhtā huuñ maiñ agar sab alāmateñ us kī

to phir vo merī tarah se hī sochtā hogā

qadīm kar ga.ī ḳhvāhish jadīd hone kī

kise ḳhabar thī yahāñ tak vo dā.era hogā

shikasta-pā.ī se hotī haiñ bastiyāñ ābād

jo ab qabīla huā pahle qāfila hogā

pasand hoñgī abhī tak kahāniyāñ us ko

vo mere jaisā koī ab bhī DhūñDtā hogā

fazā zamīn kī thī itnī ajnabī ki 'malāl'

sitāra-vār kahīñ raakh ho gayā hogā

jise sunaoge pahle hi sun chuka hoga

mujhe yaqin hai ye aisa waqia hoga

yahan to ab bhi hain tanhaiyan jawab-talab

wo pahle-pahl yahan kis tarah raha hoga

jo aaj tak hua kuchh kuchh samajh mein aata hai

koi batae yahan is ke baad kya hoga

KHala mein paenge tara jo dur tak niklen

phir is ke baad bahut dur tak KHala hoga

samajhta hun main agar sab alamaten us ki

to phir wo meri tarah se hi sochta hoga

qadim kar gai KHwahish jadid hone ki

kise KHabar thi yahan tak wo daera hoga

shikasta-pai se hoti hain bastiyan aabaad

jo ab qabila hua pahle qafila hoga

pasand hongi abhi tak kahaniyan us ko

wo mere jaisa koi ab bhi DhunDta hoga

faza zamin ki thi itni ajnabi ki 'malal'

sitara-war kahin rakh ho gaya hoga